ന്യൂഡൽഹിയിലേക്കുള്ള രാജധാനി എക്സ്പ്രസ് അസാമിലെ ഹോജായ് ജില്ലയിൽ ശനിയാഴ്ച പുലർച്ചെ കാട്ടാനകളുടെ കൂട്ടത്തിൽ ഇടിച്ചു എട്ട് ആനകൾ മരിച്ചു. ലോക്കോമോട്ടിവും അഞ്ച് കോച്ചുകളും പാളം തെറ്റിയെങ്കിലും യാത്രക്കാർക്ക് പരിക്കുകളൊന്നും റിപ്പോർട്ട് ചെയ്തിട്ടില്ല.
ഡിസംബർ 20-ന് പുലർച്ചെ 2.17 ഓടെ ഗുവാഹത്തിയിൽ നിന്ന് ഏകദേശം 126 കിലോമീറ്റർ അകലെയുള്ള ലുംഡിംഗ് ഡിവിഷനിലെ ജാമുനാമുഖ്–കാംപൂർ റെയിൽവേ വിഭാഗത്തിലാണ് അപകടം ഉണ്ടായത്. ട്രാക്ക് മുറിച്ചുകടക്കുകയായിരുന്ന ആനക്കൂട്ടത്തിൽ ട്രെയിൻ നമ്പർ 20507 സൈറാങ്–ന്യൂഡൽഹി രാജധാനി എക്സ്പ്രസ് ഇടിക്കുകയായിരുന്നുവെന്ന് നോർത്ത് ഈസ്റ്റ് ഫ്രണ്ടിയർ റെയിൽവേ അധികൃതർ അറിയിച്ചു. ആനകളെ കണ്ട ഉടൻ ലോക്കോ പൈലറ്റ് അടിയന്തര ബ്രേക്ക് പ്രയോഗിച്ചെങ്കിലും അപകടം ഒഴിവാക്കാനായില്ല.

സംഭവത്തെ തുടർന്ന് വനംവകുപ്പ് ഉദ്യോഗസ്ഥർ സ്ഥലത്തെത്തി.നഗാവ് ഡിവിഷണൽ ഫോറസ്റ്റ് ഓഫീസർ സുഹാസ് കടം അപകടത്തിൽ എട്ട് ആനകൾ മരിക്കുകയും ഒന്ന് പരിക്കേൽക്കുകയും ചെയ്തതായി സ്ഥിരീകരിച്ചു. അപകടം നടന്ന സ്ഥലം ഔദ്യോഗികമായി ആനക്കോറിഡറായി പ്രഖ്യാപിച്ചിട്ടില്ലെന്നും റെയിൽവേ അറിയിച്ചു.

പാളം തെറ്റിയ കോച്ചുകളിലെ യാത്രക്കാരെ മറ്റ് കോച്ചുകളിലേക്ക് മാറ്റി കേടുപാടുള്ള കോച്ചുകൾ വേർതിരിച്ച ശേഷം ട്രെയിൻ രാവിലെ 6.11 ഓടെ ഗുവാഹത്തിയിലേക്ക് പുറപ്പെട്ടു. അവിടെ അധിക കോച്ചുകൾ ചേർത്ത ശേഷം ട്രെയിൻ ന്യൂഡൽഹിയിലേക്കുള്ള യാത്ര തുടരുമെന്നും അധികൃതർ പറഞ്ഞു. ഗുവാഹത്തി റെയിൽവേ സ്റ്റേഷനിൽ ഹെൽപ്‌ലൈൻ നമ്പറുകൾ പ്രവർത്തനസജ്ജമാക്കി. പുനരുദ്ധാരണ പ്രവർത്തനങ്ങൾ പുരോഗമിക്കുന്നതിനാൽ ഇതുവഴിയുള്ള മറ്റു ട്രെയിനുകൾ ബദൽ മാർഗങ്ങളിലൂടെ തിരിച്ചുവിട്ടു.

റെയിൽവേ പാതകളോടനുബന്ധിച്ച മനുഷ്യ–വന്യജീവി സംഘർഷം വീണ്ടും ശ്രദ്ധയിൽപ്പെടുത്തുന്നതാണ് ഈ സംഭവം. സർക്കാർ കണക്കുകൾ പ്രകാരം 2009–10 മുതൽ 2024 വരെ ഇന്ത്യയിൽ ട്രെയിൻ അപകടങ്ങളിൽ കുറഞ്ഞത് 186 ആനകളെങ്കിലും കൊല്ലപ്പെട്ടിട്ടുണ്ട്; ഏറ്റവും കൂടുതൽ മരണങ്ങൾ രേഖപ്പെടുത്തിയിരിക്കുന്നത് അസാമിലാണ്. വന്യജീവി വിദഗ്ധർ വനംവകുപ്പും റെയിൽവേയും തമ്മിലുള്ള മികച്ച ഏകോപനത്തിന്റെ ആവശ്യകത ചൂണ്ടിക്കാട്ടിയിരിക്കുകയാണ്. അപകടങ്ങൾ തടയുന്നതിനായി അത്യന്താപേക്ഷിതമായി പരിഗണിക്കേണ്ട 14 സംസ്ഥാനങ്ങളിലായി 77 റെയിൽവേ ഭാഗങ്ങൾ സർക്കാർ തിരിച്ചറിഞ്ഞിട്ടുണ്ടെന്നും, അപകടസാധ്യതയുള്ള മേഖലകളിൽ ഇൻട്രൂഷൻ ഡിറ്റക്ഷൻ സിസ്റ്റങ്ങൾ സ്ഥാപിച്ചുവരികയാണെന്നും അധികൃതർ അറിയിച്ചു.