തിരുവനന്തപുരം:കേരള മുഖ്യമന്ത്രിയായ പിണറായി വിജയനെതിരായി ബിജെപി നേതാവ് രാജീവ് ചന്ദ്രശേഖർ കടുത്ത വിമർശനം ഉന്നയിച്ചു. തിരഞ്ഞെടുപ്പ് അടുത്തെത്തുമ്പോൾ മുഖ്യമന്ത്രി പ്രഖ്യാപിക്കുന്ന വിവിധ പദ്ധതികൾ “തിരഞ്ഞെടുപ്പ് നാടകങ്ങൾ” മാത്രമാണെന്ന് അദ്ദേഹം ആരോപിച്ചു.

സോഷ്യൽ മീഡിയയിൽ അദ്ദേഹം ഇങ്ങനെ എഴുതി . “കേരളത്തിന് ആറുലക്ഷം കോടി രൂപയുടെ കടബാധ്യതയുണ്ട് — ഇത്തരത്തിൽ പിണറായി വിജയൻ എങ്ങനെ തന്റെ വാഗ്ദാനങ്ങൾ നിറവേറ്റും?” അദ്ദേഹം ചോദിച്ചു

ഒൻപതു വർഷത്തിലേറെയായി അധികാരത്തിൽ ഇരുന്നിട്ടും നാല് മാസം മാത്രം ബാക്കി നിൽക്കുമ്പോഴാണ് മുഖ്യമന്ത്രി “പാവപ്പെട്ടവരെ ഓർക്കുന്നത്” എന്നും, 2021ലെ സിപിഎം തിരഞ്ഞെടുപ്പ് പ്രഖ്യാപനപത്രികയിൽ ഉൾപ്പെടുത്തിയ പദ്ധതികളെയാണ് ഇപ്പോൾ വീണ്ടും പ്രഖ്യാപിക്കുന്നതെന്നും അദ്ദേഹം ചൂണ്ടിക്കാട്ടി.

“ജനങ്ങളെ സഹായിക്കുന്ന ഓരോ സത്യസന്ധമായ ശ്രമത്തെയും ഞാൻ സ്വാഗതം ചെയ്യുന്നു. പക്ഷേ ഇത് ജനങ്ങളെ വഞ്ചിക്കാനുള്ള തെരഞ്ഞെടുപ്പ് സമയ നാടകമാണ്,” ചന്ദ്രശേഖർ പറഞ്ഞു. “വോട്ട് തേടുമ്പോൾ മുഖ്യമന്ത്രി പറഞ്ഞത് ‘എല്ലാം ശരിയാകും’ എന്നാണ്, എന്നാൽ ഇപ്പോൾ കാലാവധി തീരാൻ പോകുമ്പോഴാണ് പ്രവർത്തനം തുടങ്ങുന്നത്,” എന്നും അദ്ദേഹം കൂട്ടിച്ചേർത്തു.

പ്രധാനമന്ത്രി നരേന്ദ്ര മോദിയുടെ ഭരണരീതിയുമായും അദ്ദേഹം താരതമ്യം നടത്തി. “പി.എം. കിസാൻ മുതൽ ആയുഷ്മാൻ ഭാരത് വരെ — പ്രധാനമന്ത്രി ഒന്നാം ദിവസത്തിൽ തുടങ്ങി പതിനൊന്നാം വർഷം വരെയും, വർഷം മുഴുവൻ പ്രവർത്തനഫലങ്ങൾ നൽകി,” എന്ന് അദ്ദേഹം പറഞ്ഞു 

കേരളത്തിന്റെ സമ്പദ്‌വ്യവസ്ഥ ഇപ്പോൾ ഒരു “പോൺസി സ്കീം” പോലെ പ്രവർത്തിക്കുന്നുവെന്നും അദ്ദേഹം ആരോപിച്ചു. “പെൻഷൻ പണം ആരോഗ്യ മേഖലയിലേക്ക് മാറ്റുന്നു, പട്ടികജാതി ക്ഷേമ നിധികൾ ഇടനിലക്കാരെ സംരക്ഷിക്കാനായി ഉപയോഗിക്കുന്നു, വീടുകൾക്കും കുടിവെള്ളത്തിനും സ്കൂളുകൾക്കും വേണ്ടിയുള്ള പണം പലിശ അടയ്‌ക്കാനാണ് ഉപയോഗിക്കുന്നത്,” എന്ന് ചന്ദ്രശേഖർ ആരോപിച്ചു.

“ആറുലക്ഷം കോടി രൂപയുടെ കടബാധ്യതയുള്ളപ്പോൾ പുതിയ വാഗ്ദാനങ്ങൾ യാഥാർത്ഥ്യമാകാൻ സാധ്യതയില്ല,” അദ്ദേഹം പറഞ്ഞു. പരാജയപ്പെടുകയാണെങ്കിൽ “കേന്ദ്രം പണം നൽകിയില്ല” എന്നാണു മുഖ്യമന്ത്രി പറയുന്നതെന്നും അദ്ദേഹം പരിഹസിച്ചു.

“വിക്സിത കേരളം” സൃഷ്ടിക്കാൻ സത്യസന്ധതയും നല്ല നയങ്ങളും അഴിമതിയില്ലാത്ത ഭരണവ്യവസ്ഥയുമാണ് വേണ്ടതെന്ന് ചൂണ്ടിക്കാട്ടി, മുഖ്യമന്ത്രി പിണറായി വിജയൻ സത്യസന്ധനാണെങ്കിൽ 70 വയസിന് മുകളിൽ പ്രായമുള്ള മലയാളികൾക്ക് സൗജന്യാരോഗ്യ ഇൻഷുറൻസ് നൽകുന്ന പ്രധാനമന്ത്രി ആയുഷ്മാൻ ഭാരത് പദ്ധതി സംസ്ഥാനത്ത് നടപ്പാക്കണം എന്നും അദ്ദേഹം ആവശ്യപ്പെട്ടു.