തിരുവനന്തപുരം: സംസ്ഥാനത്തെ സ്‌കൂൾ ഉച്ചഭക്ഷണ പാചക തൊഴിലാളികൾക്ക് വേതന വിതരണം ഉറപ്പാക്കുന്നതിന് 14.29 കോടി രൂപ അനുവദിച്ചതായി ധനമന്ത്രി കെ. എൻ. ബാലഗോപാൽ അറിയിച്ചു. ഫെബ്രുവരി മാസത്തിലെ 13,560 തൊഴിലാളികളുടെ വേതനം നൽകുന്നതിനായാണ് ഈ തുക സംസ്ഥാന സർക്കാർ അധിക സഹായമായി അനുവദിച്ചത്.

കേരളത്തിൽ സ്‌കൂൾ ഉച്ചഭക്ഷണ പാചക തൊഴിലാളികൾക്ക് പ്രതിമാസം 20 പ്രവൃത്തി ദിവസങ്ങൾക്കായി 13,500 രൂപയാണ് ലഭ്യമാക്കുന്നത്. അതിൽ കേന്ദ്ര വിഹിതം 600 രൂപ മാത്രമാണെന്നും ബാക്കി 12,900 രൂപ സംസ്ഥാന ഫണ്ടിൽനിന്നാണ് നൽകിയുവരുന്നതെന്നും അദ്ദേഹം വ്യക്തമാക്കി.

കേന്ദ്ര മാനദണ്ഡപ്രകാരം പാചക തൊഴിലാളികൾക്ക് പ്രതിമാസം 1000 രൂപ മാത്രമാണ് ഓണറേറിയമായി അനുവദിക്കേണ്ടത്. എന്നാൽ, കേരള സർക്കാർ അതിലധികം സഹായം നൽകുകയും പ്രതിദിന വേതനം 600 മുതൽ 675 രൂപ വരെയാക്കുകയും ചെയ്യുന്നത് പാചക തൊഴിലാളികൾക്ക് വലിയ ആശ്വാസമാണെന്ന് ധനമന്ത്രി കൂട്ടിച്ചേർത്തു.