സേലം: മലയാള സിനിമയിലെ പ്രശസ്തനായ നടൻ ഷൈൻ ടോം ചാക്കോയുടെ കുടുംബം സഞ്ചരിച്ച കാറിന് സേലത്ത് പുലർച്ചെ ഉണ്ടായ വാഹനാപകടത്തിൽ ഷൈനിന്റെ പിതാവ് സി.പി. ചാക്കോ (65) മരണപ്പെട്ടു. എറണാകുളത്ത് നിന്ന് ബെംഗളൂരുവിലേക്ക് യാത്ര ചെയ്തിരുന്ന കുടുംബം പുലർച്ചെ ആറുമണിയോടെ സേലത്തിനടുത്ത് അപകടത്തിൽപെട്ടതാണെന്ന് പോലീസ് അറിയിച്ചു.

കാറിൽ ഷൈൻ ടോം ചാക്കോ, മാതാവ്, സഹോദരൻ, ഡ്രൈവർ എന്നിവരും ഉണ്ടായിരുന്നു. അപകടസമയത്ത് ഷൈൻ ടോം ചാക്കോ പിന്നിലെ സീറ്റിൽ ഉറങ്ങിക്കിടക്കുകയായിരുന്നു. ട്രാക്ക് മാറി വന്ന ലോറി ഇവർ സഞ്ചരിച്ച കാറിൽ ഇടിച്ചുകയറുകയായിരുന്നു. ഗുരുതരമായി പരുക്കേറ്റ പിതാവ് സി.പി. ചാക്കോയെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ഷൈൻ ടോം ചാക്കോയുടെ വലതുകൈക്ക് പരിക്കേറ്റിട്ടുണ്ട്. അദ്ദേഹത്തിന് ശസ്ത്രക്രിയ ആവശ്യമായേക്കും എന്നാണ് പ്രാഥമിക വിവരം. അമ്മയ്ക്കും സഹോദരനും ഡ്രൈവർക്കും നേരിയ പരിക്കുകളാണ് ഉണ്ടായത്. എല്ലാവരെയും ധർമ്മപുരിയിലെ ആശുപത്രിയിൽ പ്രവേശിപ്പിച്ചിട്ടുണ്ട്.

ബെംഗളൂരുവിലേക്ക് ചികിത്സയ്ക്കായി പോകുന്നതിനിടെയാണ് അപകടം ഉണ്ടായത്. അപകടത്തെ തുടർന്ന് സിനിമാ മേഖലയിലും ആരാധകർക്കിടയിലും വലിയ ദുഃഖം പ്രകടമായി.