മുംബൈ, മേയ് 20, 2025:
രാജ്യത്തെ ഏറ്റവും വലിയ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്‌ബിഐ) 2025 മാർച്ചിൽ അവസാനിച്ച സാമ്പത്തിക വർഷത്തിൽ 9.2 ബില്യൺ ഡോളർ (₹70,901 കോടി) എന്ന റെക്കോർഡ് ലാഭം റിപ്പോർട്ട് ചെയ്തു,കഴിഞ്ഞ വർഷത്തേക്കാൾ 16% വർധനയാണിത്. ലാഭത്തിൽ ആഗോള തലത്തിൽ ടോപ്പ് 100 ലിസ്റ്റിൽ ഇടം നേടുന്ന മൂന്നാമത്തെ ഇന്ത്യൻ സ്ഥാപനമാണ് എസ് ബി ഐ. മുൻപ് റിലയൻസ് ഇൻഡസ്ട്രീസ്, ഓഎൻജിസി എന്നിവ മാത്രമാണ് ഈ നേട്ടം കൈവരിച്ചത്.

ബാങ്കിന്റെ ഈ മികച്ച പ്രകടനത്തിന് പ്രധാന കാരണം ഡിജിറ്റൽ പരിവർത്തനമാണ്, പ്രത്യേകിച്ച് യോനോ ആപ്പിന്റെ വികസനം ഇതിൽ പ്രധാന പങ്കു വഹിക്കുന്നു. 2017-ൽ ആരംഭിച്ച യോനോ, ഇപ്പോൾ 7.4 കോടി രജിസ്റ്റർ ചെയ്ത ഉപയോക്താക്കളുണ്ട്. ബാങ്കിന്റെ സേവിങ്സ് അക്കൗണ്ട് ഇടപാടുകളിൽ 65% യോനോ വഴി നടക്കുന്നു.

500 മില്യൺ അക്കൗണ്ടുകൾ എസ്ബിഐ കൈകാര്യം ചെയ്യുമ്പോഴും, ലാഭത്തിൽ വലിയ പങ്ക്  ഡിജിറ്റൽ ഉപയോക്തൃ വിഭാഗം നൽകുന്നതാണ് ശ്രദ്ധേയമാക്കുന്നത്. ഡിജിറ്റൽ ഉപയോക്താക്കളുടെ പങ്കാളിത്തം എസ്ബിഐയുടെ ലാഭം വർധിപ്പിക്കാൻ നിർണായകമായി.

2025 സാമ്പത്തിക വർഷത്തിൽ പൊതുമേഖലാ ബാങ്കുകൾ നേടിയ മൊത്തം ലാഭത്തിൽ 40%ൽ കൂടുതൽ എസ്ബിഐയുടെ സംഭാവനയാണ്. പൊതുമേഖലാ ബാങ്കുകൾ  ഒന്നാകെ ഈ വർഷം 1.78 ലക്ഷം കോടി രൂപയുടെ റെക്കോർഡ് ലാഭം റിപ്പോർട്ട് ചെയ്തു, ഇത് കഴിഞ്ഞ വർഷത്തേക്കാൾ 26% കൂടുതലാണ്.

ഡിജിറ്റൽ തന്ത്രം വിജയകരമായതിന്റെ തെളിവാണ് എസ്ബിഐയുടെ ഈ റെക്കോർഡ് നേട്ടം, കൂടാതെ ഇന്ത്യൻ ബാങ്കിംഗ് മേഖലയിലെ അതിന്റെ ശക്തിയും സ്ഥിരതയും വീണ്ടും തെളിയിക്കുന്നു.