സിഡ്നി: ഓസ്ട്രേലിയക്കെതിരായ ഏകദിന മത്സരത്തിനിടെ ഇന്ത്യൻ ക്രിക്കറ്റ് താരം ശ്രേയസ് അയ്യർക്ക് വാരിയെല്ലിന് ഗുരുതരമായി പരിക്കേറ്റു. സിഡ്നിയിലെ ഒരു സ്വകാര്യ ആശുപത്രിയിലെ ഐസിയുവിലാണ് താരം ഇപ്പോള് ചികിത്സയിൽ കഴിയുന്നത്.
മത്സരത്തിനിടെ ക്യാച്ചെടുക്കുന്നതിനിടെ വീണതോടെയാണ് വാരിയെല്ലിന് ക്ഷതം സംഭവിച്ചത്. പ്രാഥമിക പരിശോധനയിൽ ആന്തരിക രക്തസ്രാവം കണ്ടെത്തിയതിനെ തുടർന്ന് അടിയന്തരമായി ആശുപത്രിയിൽ എത്തിക്കുകയായിരുന്നു. അണുബാധ ഉണ്ടാകാതിരിക്കാൻ വേണ്ടിയും നിരീക്ഷണത്തിന് വേണ്ടിയും മെഡിക്കൽ ടീം ഐസിയുവിൽ പ്രവേശിപ്പിച്ചു.
ബിസിസിഐ വൃത്തങ്ങൾ നൽകിയ വിവരംപ്രകാരം, അയ്യറിന്റെ ആരോഗ്യനില നിലവിൽ തൃപ്തികരമാണ്, എങ്കിലും അദ്ദേഹം തുടർ നിരീക്ഷണത്തിലാണ്. ഡോക്ടർമാരുടെ നിർദ്ദേശപ്രകാരം അടുത്ത ഏഴ് ദിവസം വരെ ആശുപത്രിയിൽ തുടരേണ്ടിവരാനിടയുണ്ട്.
ഈ പരിക്ക് കാരണം ദക്ഷിണാഫ്രിക്കക്കെതിരായ വരാനിരിക്കുന്ന പരമ്പരയിൽ അയ്യറിന് കളിക്കാനാവില്ലെന്ന് ഉറപ്പായി. പൂർണ്ണമായി സുഖം പ്രാപിച്ചതിന് ശേഷം മാത്രമേ അദ്ദേഹം ഇന്ത്യയിലേക്ക് മടങ്ങുകയുള്ളൂ. വിദഗ്ധർ അഭിപ്രായപ്പെടുന്നത്, അദ്ദേഹത്തിന്റെ തിരിച്ചുവരവിന് കുറച്ച് കൂടുതൽ സമയം എടുക്കേണ്ടിവരുമെന്നാണ്.
