ഉധംപൂർ: സർക്കാർ സംരംഭങ്ങളുടെയും അനുകൂലമായ കാലാവസ്ഥയുടെയും പിന്തുണയിൽ ജമ്മു കശ്മീരിലെ ഉധംപൂരിൽ സ്ട്രോബെറി കൃഷി ശ്രദ്ധേയമായ വളർച്ചയ്ക്ക് സാക്ഷ്യം വഹിക്കുന്നു, പ്രദേശത്തുടനീളമുള്ള കർഷകർ പ്രാദേശിക കൃഷി സമ്പ്രദായങ്ങളെ മാറ്റിവെച്ച് ലാഭകരമായ ഈ വിളയെ സ്വീകരിക്കുന്നു.
ഈയിടെ പെയ്ത മഴ, സ്ട്രോബെറി കർഷകർക്ക് ഏറെ നാളത്തെ വരൾച്ചയ്ക്ക് ശേഷം ആവശ്യമായ ആശ്വാസം പകർന്നു. മെച്ചപ്പെട്ട കാലാവസ്ഥ വിളവ് വർധിപ്പിച്ചു, ഇത് സീസണിൻ്റെ തുടക്കത്തിൽ ബുദ്ധിമുട്ടിയ കർഷകർക്ക് പ്രതീക്ഷ നൽകുന്നു.
യുടി കാപെക്‌സ് സ്കീം, ഹോളിസ്റ്റിക് അഗ്രികൾച്ചർ ഡെവലപ്‌മെൻ്റ് പ്രോഗ്രാം തുടങ്ങിയ സർക്കാർ പദ്ധതികളാണ് സ്ട്രോബെറി കൃഷിയുടെ കുതിച്ചുചാട്ടത്തിന് കാരണമായത്. ഈ സംരംഭങ്ങൾ സാമ്പത്തിക പ്രോത്സാഹനവും, കൃഷിക്കാവശ്യമായ ജലം നൽകാൻ കുഴൽക്കിണറുകളും പാക്കിംഗ് ഹൗസുകളും ഉൾപ്പെടെയുള്ള അടിസ്ഥാന സൗകര്യങ്ങൾ നൽകുന്നു.
ഉധംപൂരിലെ കർഷകർ സ്ട്രോബെറി കൃഷിയിൽ നിന്ന് ഒരു കനാലിന്(ഒരു കനാൽ സാധാരണയായി ഒരു ഹെക്ടറിൻ്റെ 1/100 ഭാഗമാണ്) 60,000 മുതൽ 70,000 രൂപ വരെ വരുമാനം നേടുന്നതായാണ് റിപ്പോർട്ട്. ഈ സാമ്പത്തിക പ്രോത്സാഹനം കൂടുതൽ കർഷകരെ വിളയിലേക്ക് ആകർഷിക്കുന്നു, പ്രത്യേകിച്ച് സ്ട്രോബെറിയുടെ ആവശ്യം വർദ്ധിക്കുന്നതിനാൽ
സ്ട്രോബെറിയുടെ വർദ്ധിച്ചുവരുന്ന ആവശ്യം കർഷകർക്കിടയിൽ കൂടുതൽ ശുഭാപ്തിവിശ്വാസം ഉയർത്തി. സർക്കാർ പിന്തുണയും അനുകൂലമായ കാലാവസ്ഥയും ഉള്ളതിനാൽ, ഈ മേഖലയിലെ സ്ട്രോബെറി കൃഷിയുടെ കേന്ദ്രമായി ഉദംപൂർ ഉയർന്നുവരുന്നു.
ഏകദേശം 60,000 ടൺ വാർഷിക ഉൽപ്പാദനത്തോടെ, ലോകത്ത് സ്ട്രോബെറി ഉൽപ്പാദിപ്പിക്കുന്ന ആറാമത്തെ വലിയ രാജ്യമാണ് ഇന്ത്യ. സ്ട്രോബെറി ഉത്പാദനത്തിൽ ചൈന, അമേരിക്ക, തുർക്കി മെക്സിക്കോ ഈജിപ്ത് എന്നിവരാണ് മുൻനിരയിലുള്ള രാജ്യങ്ങൾ
ഇന്ത്യയിലെ സ്ട്രോബെറി ഉൽപ്പാദനം പ്രധാനമായും കേന്ദ്രീകരിച്ചിരിക്കുന്നത് മഹാരാഷ്ട്ര, ഹരിയാന, ജമ്മു & കശ്മീർ തുടങ്ങിയ സംസ്ഥാനങ്ങളിലാണ്, മഹാരാഷ്ട്രയിലെ മഹാബലേശ്വറാണ് ഏറ്റവും പ്രധാനപ്പെട്ട കൃഷിയിടം.
