നെൽവയലുകൾ സംരക്ഷിക്കാനുള്ള ശ്രമത്തിൽ, ടാൻസാനിയ പ്ലാന്റ് ഹെൽത്ത് ആൻഡ് പെസ്റ്റിസൈഡ് അതോറിറ്റി (ടിപിഎച്ച്പിഎ) ദശലക്ഷക്കണക്കിന് ക്യൂലിയ പക്ഷികളെ  വടക്കൻ മേഖലയായ മന്യാരയയിൽ കൊന്നൊടുക്കി.  വിളകൾ നശിപ്പിക്കുന്ന പക്ഷികളെ നാല് ദിവസത്തിനിടെ ഏരിയൽ സ്‌പ്രേയിംഗ് ഉപയോഗിച്ചാണ് കൊന്നത്.

 ഒരു ദിവസം 50 ടണ്ണിലധികം ഭക്ഷ്യവിളകൾ നശിപ്പിക്കാൻ പക്ഷികൾക്ക് കഴിവുണ്ടെന്ന് ടിപിഎച്ച്പിഎ പറഞ്ഞു. ക്യൂലിയ പക്ഷികളുടെ  കൂട്ടങ്ങളെ നശിപ്പിക്കാൻ ഏജൻസി ഇപ്പോൾ മറ്റ് പ്രദേശങ്ങൾ നിരീക്ഷിച്ചുവരികയാണ്.

 വലിയ കൂട്ടമായി നീങ്ങുന്ന ചെറിയ ചുവന്ന കൊക്കുകളുള്ള പക്ഷികൾ വിളകൾ നശിപ്പിക്കുന്നതിൽ കുപ്രസിദ്ധമാണ്, സെപ്തംബർ, ഒക്ടോബർ മാസങ്ങളിലെ വരണ്ട സീസണിന്റെ ആരംഭത്തിലാണ് ആക്രമണങ്ങൾ സാധാരണയായി സംഭവിക്കുന്നത്.

 ക്യൂലിയ പക്ഷികൾ ലോകത്തിലെ ഏറ്റവും കൂടുതൽ കാണപെടുന്ന പക്ഷി ഇനങ്ങളായി കണക്കാക്കപ്പെടുന്നു.  ആഫ്രിക്കയിലുടനീളമുള്ള ഗവൺമെന്റുകൾ മുൻകാലങ്ങളിൽ അവയെ നിയന്ത്രിക്കാൻ നിരവധി ശ്രമങ്ങൾ നടത്തിയിട്ടുണ്ട്.

 എങ്കിലും ദശലക്ഷക്കണക്കിന് പക്ഷികളെ കൊന്നൊടുക്കുന്നത് പരിസ്ഥിതി പ്രവർത്തകർക്കിടയിൽ ആശങ്ക ഉയർത്തിയിട്ടുണ്ട്. ഇത് വിളനാശത്തിന്റെ പ്രശ്നത്തിന് സുസ്ഥിരമായ പരിഹാരമല്ലെന്ന് വാദിക്കുന്നു. പക്ഷികളെ പ്രതിരോധിക്കുന്ന  വിളകൾ വികസിപ്പിക്കുക, അല്ലെങ്കിൽ പക്ഷികളെ നിയന്ത്രിക്കാൻ മാരകമല്ലാത്ത മാർഗങ്ങൾ ഉപയോഗിക്കുക തുടങ്ങിയ മാർഗങ്ങളിൽ സർക്കാർ ശ്രദ്ധ കേന്ദ്രീകരിക്കണമെന്ന് അവർ പറയുന്നു.

 പക്ഷികളെ കൊല്ലാനുള്ള തീരുമാനത്തെ ന്യായീകരിച്ച് ടിപിഎച്ച്പിഎ, രാജ്യത്തിന്റെ ഭക്ഷ്യസുരക്ഷ സംരക്ഷിക്കേണ്ടത് ആവശ്യമാണെന്ന് പറഞ്ഞു.  വിളനാശത്തിന്റെ പ്രശ്‌നത്തിന് ദീർഘകാല പരിഹാരങ്ങൾ വികസിപ്പിക്കാനുള്ള ശ്രമത്തിലാണ് തങ്ങളെന്നും എന്നാൽ നിലവിലെ വിളവെടുപ്പ് സംരക്ഷിക്കാൻ അടിയന്തര നടപടി സ്വീകരിക്കേണ്ടതുണ്ടെന്നും ഏജൻസി പറയുന്നു.