കഴിഞ്ഞ വർഷത്തെ അപേക്ഷിച്ച് 2023-ൽ ആഗോള വ്യാപാരം 5% ചുരുങ്ങുമെന്ന് പ്രതീക്ഷിക്കുന്നതായി, യുണൈറ്റഡ് നേഷൻസ് കോൺഫറൻസ് ഓൺ ട്രേഡ് ആൻഡ് ഡെവലപ്‌മെന്റ് (UNCTAD) ഈ ആഴ്ച റിപ്പോർട്ട് ചെയ്തു,ഇത് 2024 ൽ തുടർന്നേക്കുമെന്ന് കരുതുന്നു.

യുഎൻസിടിഎഡി-യുടെ കണക്കുകൾ പ്രകാരം, ഈ വർഷം ലോക വ്യാപാരം ഏകദേശം 30.7 ട്രില്യൺ ഡോളറാണ്. ചരക്ക് വ്യാപാരത്തിൽ ഏകദേശം 2 ട്രില്യൺ ഡോളർ അഥവാ 8% കുറയുമെന്ന് യുഎൻ സംഘടന പ്രവചിക്കുന്നു, അതേസമയം സേവനങ്ങളിലെ വ്യാപാരം ഏകദേശം 500 ബില്യൺ ഡോളർ അല്ലെങ്കിൽ 7% വർദ്ധിക്കുമെന്ന് പ്രതീക്ഷിക്കുന്നു.

വികസ്വര രാജ്യങ്ങളിൽ നിന്നുള്ള കയറ്റുമതി കുറഞ്ഞതും ഭൗമരാഷ്ട്രീയ പ്രശ്‌നങ്ങളും ആഗോള വ്യാപാരത്തിലെ ഇടിവിന് കാരണമായിയെന്ന് യുഎൻസിടിഎഡി പറഞ്ഞു.

“ഉക്രെയ്നിലെ യുദ്ധം, റഷ്യൻ ഫെഡറേഷനുമേലുള്ള ഉപരോധം, യുഎസ്-ചൈന വ്യാപാര ബന്ധത്തിലെ പ്രശനങ്ങൾ എന്നിവ പ്രധാന ഉഭയകക്ഷി വ്യാപാര ട്രെൻഡുകൾ രൂപപെടുത്തുന്നതിൽ പ്രധാന പങ്ക് വഹിക്കുന്നു,” റിപ്പോർട്ട് പറയുന്നു. “ഈ ഘടകങ്ങൾ നേരിട്ട് ഉൾപ്പെട്ടിരിക്കുന്ന സമ്പദ്‌വ്യവസ്ഥകളെ മാത്രമല്ല, മറ്റ് സമ്പദ്‌വ്യവസ്ഥകളുടെ വ്യാപാരത്തെയും പരോക്ഷമായി സ്വാധീനിക്കുകയും ചെയ്യുന്നു.”

ട്രേഡ് ബോഡിയുടെ അഭിപ്രായത്തിൽ, ചില സമ്പദ്‌വ്യവസ്ഥകളിലെ ഉയർന്ന പലിശനിരക്കും വാണിജ്യ പ്രവർത്തനങ്ങളെ തടസ്സപ്പെടുത്തിയിട്ടുണ്ട്.

2024-ലെ അന്താരാഷ്ട്ര വ്യാപാരത്തിൻ്റെ യുഎൻസിടിഎഡി-ന്റെ പ്രവചനം “വളരെ അനിശ്ചിതത്വവും പൊതുവെ അശുഭാപ്തികരവും” എന്ന് പറയുന്നു.

“ചില സാമ്പത്തിക സൂചകങ്ങൾ പുരോഗതിയെ സൂചിപ്പിക്കുമ്പോൾ, സ്ഥിരമായ ഭൗമരാഷ്ട്രീയ പിരിമുറുക്കങ്ങൾ, ഉയർന്ന തലത്തിലുള്ള കടം, വ്യാപകമായ സാമ്പത്തിക ദുർബലത എന്നിവ ആഗോള വ്യാപാര രീതികളിൽ നെഗറ്റീവ് സ്വാധീനം ചെലുത്തുമെന്ന് പ്രതീക്ഷിക്കുന്നു,” സംഘടന സംഗ്രഹത്തിൽ എഴുതി.

ലോകവ്യാപാരത്തിലെ ഇടിവ് ആശങ്കാജനകമായ ഒരു പ്രവണതയാണ്, കാരണം ഇത് സാവധാനത്തിലുള്ള സാമ്പത്തിക തളർച്ചക്കും ഉയർന്ന തൊഴിലില്ലായ്മയ്ക്കും ഇടയാക്കും. താരിഫ് കുറയ്ക്കുക, അടിസ്ഥാന സൗകര്യങ്ങളിൽ നിക്ഷേപിക്കുക തുടങ്ങിയ വ്യാപാരം വർധിപ്പിക്കുന്നതിനുള്ള നടപടികൾ സ്വീകരിക്കാൻ യുഎൻസിടിഎഡി സർക്കാരുകളോട് ആവശ്യപ്പെടുന്നു.