വാഷിംഗ്ടൺ: അമേരിക്കൻ സേന ഇറാനിലെ സൈനിക കേന്ദ്രങ്ങൾ തകർത്തതായി യുഎസ് സെൻട്രൽ കമാൻഡ് അറിയിച്ചു . ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) നിയന്ത്രണത്തിലുള്ള കമാൻഡ് ആൻഡ് കൺട്രോൾ കേന്ദ്രങ്ങൾ ഉൾപ്പെടെ നിരവധി ലക്ഷ്യസ്ഥാനങ്ങൾ നശിപ്പിച്ചതായും പ്രസ്താവനയിൽ പറയുന്നു.
ഐആർജിസിയുടെ കമാൻഡ്-കൺട്രോൾ സംവിധാനങ്ങൾ തകർത്തതോടെ അവരുടെ പ്രവർത്തന ഏകോപന ശേഷിക്ക് വലിയ തിരിച്ചടിയുണ്ടായതായി സെൻറ്കോം വ്യക്തമാക്കി. ഇറാന്റെ വ്യോമ പ്രതിരോധ സംവിധാനങ്ങൾ, മിസൈൽ-ഡ്രോൺ വിക്ഷേപണ കേന്ദ്രങ്ങൾ, സൈനിക വിമാനത്താവളങ്ങൾ എന്നിവയും ആക്രമണത്തിൽ ലക്ഷ്യമാക്കിയതായി അറിയിച്ചു.
പ്രദേശത്ത് അമേരിക്കൻ സൈനികർക്കും സഖ്യകക്ഷികൾക്കും നേരെയുള്ള ഭീഷണികളെ കുറയ്ക്കുകയും ഇറാന്റെ ആക്രമണ ശേഷി തകർക്കുകയും ചെയ്യുക എന്ന ലക്ഷ്യത്തോടെ കൃത്യമായ വിവരങ്ങളുടെ അടിസ്ഥാനത്തിലാണ് നടപടികൾ നടത്തിയതെന്ന് സെൻറ്കോം അറിയിച്ചു. സൈനിക ലക്ഷ്യസ്ഥാനങ്ങൾ മാത്രമാണ് ആക്രമണത്തിൽ ഉൾപ്പെടുത്തിയതെന്നും വ്യക്തമാക്കി.
നാശനഷ്ടങ്ങളുടെ വ്യാപ്തി സംബന്ധിച്ചോ മരണസംഖ്യ സംബന്ധിച്ചോ കൂടുതൽ വിവരങ്ങൾ ഇതുവരെ പുറത്തുവിട്ടിട്ടില്ല.
അതേസമയം, സംഭവവികാസങ്ങൾ പശ്ചിമേഷ്യയിലെ ഭൗമരാഷ്ട്രീയ സംഘർഷങ്ങളെ കൂടുതൽ ശക്തമാക്കാൻ സാധ്യതയുണ്ടെന്ന് വിലയിരുത്തപ്പെടുന്നു. ഇറാൻ ഇതുവരെ സംഭവത്തെക്കുറിച്ച് സമഗ്രമായ പ്രതികരണം പുറത്തുവിട്ടിട്ടില്ല.
