ഉത്തർപ്രദേശിലെ ബഹ്‌റൈച്ച് ജില്ലയിൽ ചെന്നായ്ക്കളുടെ തുടർച്ചയായുള്ള ആക്രമണം ഭീകരതയുടെ അന്തരീക്ഷം സൃഷ്ടിച്ചിരിക്കുകയാണ്.കഴിഞ്ഞ ദിവസം മഹാസി തെഹ്‌സിൽ പ്രദേശത്ത് ചെന്നായയുടെ ആക്രമണത്തിൽ അഞ്ച് വയസുകാരിക്ക് പരിക്കേറ്റതാണ് ഏറ്റവും പുതിയ സംഭവം.

 ജൂലൈ 17 ന്, സിക്കന്ദർപൂർ ഗ്രാമത്തിൽ ഒരു വയസ്സുള്ള ആൺകുട്ടി കൊല്ലപ്പെട്ടതിന് ശേഷം, ഈ ആക്രമണങ്ങളിൽ കുറഞ്ഞത് 10 പേർക്ക് ജീവൻ നഷ്ടപ്പെടുകയും 30 ഓളം പേർക്ക് പരിക്കേൽക്കുകയും ചെയ്തു.  ചെന്നായ്ക്കളുടെ നിരന്തരമായ ഭീഷണി കാരണം ഡസൻ കണക്കിന് ഗ്രാമങ്ങളിലെ ആയിരക്കണക്കിന് നിവാസികൾ ഭയത്തോടെയാണ് ഉറങ്ങാതെ രാത്രികൾ കഴിച്ചുകൂട്ടുന്നത്.

 ഈ മേഖലയിൽ വേനൽക്കാലത്ത് ചൂടിൽ നിന്ന് രക്ഷപ്പെടാൻ വീടിന് വെളിയിൽ ഉറങ്ങുക പതിവാണ് . ഇങ്ങനത്തെ സാഹചര്യത്തിൽ കുട്ടികളെ തട്ടിയെടുക്കുകയും ചെയ്യുന്നതായി അറിയപ്പെടുന്നു. അടുത്തിടെ മൂന്നുവയസ്സുകാരിയെ മാരകമായി ആക്രമിച്ച് കൊലപ്പെടുത്തിയത്  സമൂഹത്തെ ഞെട്ടിച്ചിരിക്കുകയാണ്.

 പ്രതിസന്ധി രൂക്ഷമായതിനെ തുടർന്ന് ഉത്തർപ്രദേശ് സർക്കാർ ചെന്നായ ആക്രമണം റിപ്പോർട്ട് ചെയ്ത സ്ഥലങ്ങളിൽ അധികം വനം വകുപ്പ് ഉദ്യോഗസ്ഥരെ വിന്യസിച്ചിട്ടുണ്ട്. കുറഞ്ഞത് 10 ടീമുകളെങ്കിലും മൃഗങ്ങളെ തേടി പ്രദേശത്ത് തിരച്ചിൽ നടത്തുന്നുണ്ട്.  എന്നിരുന്നാലും, നടന്നുകൊണ്ടിരിക്കുന്ന മനുഷ്യ-വന്യജീവി സംഘർഷം ഒരു പ്രധാന ആശങ്കയായി തുടരുന്നു, കൂടാതെ സ്ഥലവാസികൾ തങ്ങളുടെ ജീവൻ സംരക്ഷിക്കാൻ കൂടുതൽ ഫലപ്രദമായ നടപടികൾ ആവശ്യപ്പെടുന്നു.