കോഴിക്കോട് തേഞ്ഞിപ്പലം ചെനക്കലങ്ങാടി പള്ളിപ്പടിയിൽ വീട്ടുമുറ്റത്ത് കാറിന് തീപിടിച്ച് ഗുരുതരമായി പൊള്ളലേറ്റ യുവാവ് ചികിത്സയ്‌ക്കിടെ മരണപ്പെട്ടു. ചേളാരി ജി.ഡി.എസ്. ഹൈപ്പർ മാർട്ട് ഉടമ ചെനക്കലങ്ങാടി പൊറോളി അബ്‌ദുള്ളയുടെ മകൻ ആദിൽ ആരിഫാൻ (29) ആണു മരിച്ചത്.

സംഭവം കഴിഞ്ഞ തിങ്കളാഴ്ച (ഒക്ടോബർ 21) രാത്രി 11.45ഓടെയാണ് ഉണ്ടായത്. വീടിന്റെ ഗേറ്റിലെത്തിയ ഉടൻ കാർ ഓഫായതിനെ തുടർന്ന് ആദിൽ അത് വീണ്ടും സ്റ്റാർട്ടാക്കി മുന്നോട്ടെടുത്തപ്പോൾ എൻജിൻ ഭാഗത്ത് നിന്ന് തീയും പുകയും പടരുകയായിരുന്നു. അന്ന് കാറിനുള്ളിൽ ഒറ്റയ്ക്കായിരുന്ന ആദിൽ ഒരുവിധം വാതിൽ തുറന്ന് പുറത്തേക്കിറങ്ങി, പക്ഷേ അതുവരെ ശരീരത്തിന്റെ വലിയ ഭാഗം തീയിൽ പൊള്ളിയിരുന്നു.
നിലവിളി കേട്ട് ഓടിയെത്തിയ വീട്ടുകാരും നാട്ടുകാരുമാണ് തീയണച്ചത്. വീട്ടുമുറ്റത്തുനിന്ന് തീഗോളങ്ങൾ ഉയർന്നത് പ്രദേശവാസികളെ പരിഭ്രാന്തരാക്കി. ഗുരുതരമായി പരിക്കേറ്റ ആദിലിനെ ആദ്യം ചേളാരിയിലെ സ്വകാര്യ ആശുപത്രിയിലും പിന്നീട് കോഴിക്കോട് മെഡിക്കൽ കോളേജിലേക്കും മാറ്റി. അവിടെനിന്ന് വിദഗ്ധ ചികിത്സയ്ക്കായി ഡൽഹിയിലെ എയിംസിലേക്കും മാറ്റിയെങ്കിലും ഇന്ന് പുലർച്ചെ മരണത്തിന് കീഴടങ്ങുകയായിരുന്നു.

ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. രണ്ട് വർഷം മാത്രം പഴക്കമുള്ള, 16 ലക്ഷത്തിലധികം രൂപ വിലവരുന്ന കാർ പൂർണമായും കത്തിനശിച്ചു.
ദുബായിൽ ബിസിനസ് നടത്തുന്ന ആദിൽ, ഒന്നര മാസം മുൻപാണ് നാട്ടിലെത്തിയത്, ഉടൻ തന്നെ ദുബായിലേക്ക് മടങ്ങാനുള്ള ഒരുക്കത്തിലായിരുന്നു.