ബീജിംഗ്/കാരക്കാസ് — വെനസ്വേലൻ പ്രസിഡന്റ് നിക്കോളാസ് മഡുറോയെ യുഎസ് പിടികൂടിയ സംഭവത്തെ ചൈനയുടെ വിദേശകാര്യ മന്ത്രാലയം ശക്തമായി അപലപിച്ചു. ഇത് അന്താരാഷ്ട്ര നിയമം ലംഘിക്കുന്നതും രാജ്യത്തിന്റെ പരമാധികാരത്തെ തകർക്കുന്നതുമായ ഒരു “ആധിപത്യ നടപടി” ആണെന്ന് ചൈന ആരോപിച്ചു. ഒരു സ്വതന്ത്ര രാഷ്ട്രത്തിന്റെ ആഭ്യന്തര കാര്യങ്ങളിൽ നഗ്നമായ ഇടപെടലുമാണെന്ന് ചൈനീസ് വിദേശകാര്യ മന്ത്രാലയം പറഞ്ഞു. ഇത്തരം ഏകപക്ഷീയ നടപടികൾ ആഗോള സ്ഥിരതക്കും അന്താരാഷ്ട്ര ക്രമത്തിനും ഭീഷണിയാണെന്നും ബീജിംഗ് മുന്നറിയിപ്പ് നൽകി.മഡുറോയെ ഉടൻ മോചിപ്പിക്കണമെന്ന് ആവശ്യപ്പെട്ടതായി ചൈനയുടെ സർക്കാർ മാധ്യമമായ ഷിൻഹ്വ റിപ്പോർട്ട് ചെയ്തു.

കാരക്കാസിൽ നടന്ന നാടകീയമായ യുഎസ് സൈനിക നടപടിയെത്തുടർന്നാണ് ചൈനയുടെ പ്രതികരണം. പ്രസിഡന്റ് ഡൊണാൾഡ് ട്രംപിന്റെ അനുമതിയോടെയാണ് ഈ നടപടി നടപ്പാക്കിയതെന്ന് റിപ്പോർട്ടുകളുണ്ട്. വെനസ്വേലൻ സർക്കാർ ലക്ഷ്യങ്ങളിലേക്കുള്ള വ്യോമാക്രമണങ്ങൾക്കുശേഷം പ്രസിഡന്റ് മഡുറോയെയെ രാജ്യതലസ്ഥാനത്ത് നിന്ന് പുറത്തേക്ക് കൊണ്ടുപോയി. 2020-ൽ യുഎസ് ഫയൽ ചെയ്ത മയക്കുമരുന്ന്–ഭീകരവാദ കേസുകളുമായി ബന്ധപ്പെട്ട കുറ്റപത്രങ്ങൾ പ്രകാരം വിചാരണയ്ക്കായി മഡുറോയെ ന്യൂയോർക്കിലേക്ക് കൊണ്ടുപോയതായി അമേരിക്കൻ അധികൃതർ അറിയിച്ചു.

കാരക്കാസിലെ തങ്ങൾ “ക്രിമിനൽ ഭരണകൂടം” എന്ന് വിശേഷിപ്പിക്കുന്ന സംവിധാനത്തെ ഇല്ലാതാക്കാനും വെനസ്വേലയിൽ അമേരിക്ക അനുകൂലമായ ഇടക്കാല സർക്കാർ രൂപീകരിക്കാനും വേണ്ടിയുള്ള നടപടിയുടെ ഭാഗമാണിതെന്ന് വാഷിംഗ്ടൺ വിശദീകരിച്ചു. ലോകത്തിലെ ഏറ്റവും വലിയ സ്ഥിരീകരിച്ച എണ്ണശേഖരമുള്ള രാജ്യമാണ് വെനസ്വേല. രാജ്യത്ത് ജനാധിപത്യം പുനഃസ്ഥാപിക്കാനും സ്ഥിരത കൈവരിക്കാനുമാണ് നടപടിയെന്ന് യുഎസ് അവകാശപ്പെട്ടു.

ഈ സംഭവത്തോടെ യുഎസും ബ്രിക്സ് (BRICS) രാജ്യകൂട്ടായ്മയും തമ്മിലുള്ള സംഘർഷം കൂടുതൽ രൂക്ഷമായിട്ടുണ്ട്. ബ്രിക്സിലെ പ്രധാന അംഗമായ ചൈനയ്ക്ക് വെനസ്വേലയിൽ വലിയ സാമ്പത്തിക താൽപര്യങ്ങളുള്ളതിനാൽ മഡുറോയുടെ തടങ്കൽ ബീജിംഗിൽ ഗുരുതര ആശങ്ക ഉയർത്തിയിട്ടുണ്ട്. കഴിഞ്ഞ രണ്ട് ദശാബ്ദങ്ങളിലായി വെനസ്വേലയുടെ എണ്ണ, ഊർജ്ജ, അടിസ്ഥാന സൗകര്യ മേഖലകളിൽ ചൈനീസ് സർക്കാർ ബന്ധമുള്ള കമ്പനികൾ ഏകദേശം 60 ബില്യൺ ഡോളറിന്റെ നിക്ഷേപമാണ് നടത്തിയിരിക്കുന്നത്.
കാരക്കാസിന്റെ അടുത്ത സഖ്യകക്ഷിയായ റഷ്യയും ശക്തമായ പ്രതികരണമാണ് നടത്തിയത്. വെനസ്വേലയ്ക്ക് നയതന്ത്രപരവും തന്ത്രപരവുമായ പിന്തുണ നൽകുമെന്ന് മോസ്കോ സൂചന നൽകി. റഷ്യയുടെ നിലപാടും ചൈനയുടെ കടുത്ത വിമർശനവും ചേർന്ന് ആഗോള തലത്തിൽ സംഘർഷരേഖകൾ കൂടുതൽ ആഴപ്പെടുത്തുമെന്ന് നിരീക്ഷകർ പറയുന്നു.
ഇതിന്റെ പ്രതിഫലനം ആഗോള വിപണികളിലും പ്രകടമാകാൻ തുടങ്ങിയിട്ടുണ്ട്. വെനസ്വേലയിലെ രാഷ്ട്രീയ അനിശ്ചിതത്വവും എണ്ണ ഉത്പാദനത്തെക്കുറിച്ചുള്ള ആശങ്കകളും വിതരണ ശൃംഖലകളെ ബാധിക്കുമെന്ന മുന്നറിയിപ്പാണ് ഊർജ്ജ വിദഗ്ധർ നൽകുന്നത്. അന്താരാഷ്ട്ര നാണയനിധി (IMF) അടുത്തിടെ പുറത്തിറക്കിയ പ്രവചനങ്ങൾ പ്രകാരം, പ്രതിസന്ധി നീണ്ടുനിൽക്കുകയാണെങ്കിൽ ആഗോള ഊർജ്ജ വിലകൾ 5 മുതൽ 10 ശതമാനം വരെ ഉയരാൻ സാധ്യതയുണ്ട്. ഇത് ഇതിനകം തന്നെ സമ്മർദ്ദത്തിലായ ലോക സമ്പദ്‌വ്യവസ്ഥയ്ക്ക് അധിക വെല്ലുവിളിയാകും.

നയതന്ത്ര പ്രതികരണങ്ങൾ ശക്തമാകുന്നതിനിടെ ഐക്യരാഷ്ട്രസഭാ സുരക്ഷാ കൗൺസിലിന്റെ അടിയന്തര യോഗം വിളിക്കണമെന്ന ആവശ്യവും ഉയരുകയാണ്. അതേസമയം, തങ്ങളുടെ നടപടി നിയമപരവും അനിവാര്യവുമാണെന്ന നിലപാടിൽ വാഷിംഗ്ടൺ ഉറച്ചുനിൽക്കുകയാണ്.