കൊല്ലം: ജില്ലയിൽ പ്രവർത്തിക്കുന്ന കശുവണ്ടി ഫാക്ടറികളുടെ ഉന്നമനത്തിനായി സർക്കാർ വിവിധ ധനസഹായ പദ്ധതികൾ പ്രഖ്യാപിച്ചു. തൊഴിലാളികളുടെ സാമൂഹിക സുരക്ഷ ഉറപ്പാക്കുന്നതിനും സ്ത്രീ സൗഹൃദ അടിസ്ഥാന സൗകര്യങ്ങൾ വികസിപ്പിക്കുന്നതിനും ഉൽപ്പാദന രംഗത്ത് യന്ത്രവൽക്കരണം പ്രോത്സാഹിപ്പിക്കുന്നതിനുമാണ് പദ്ധതികൾ ലക്ഷ്യമിടുന്നത്.

ഇ.എസ്.ഐ/ഇ.പി.എഫ് പദ്ധതിയുടെ ഭാഗമായി തൊഴിലുടമ അടയ്ക്കുന്ന വിഹിതത്തിന്റെ 50 ശതമാനം വരെ സർക്കാർ തിരികെ നൽകും. ഇതിന് പരമാവധി 10 ലക്ഷം രൂപയാണ് ധനസഹായ പരിധി. തൊഴിലാളികളുടെ ക്ഷേമം ഉറപ്പാക്കുന്നതിനൊപ്പം ഫാക്ടറി ഉടമകൾക്ക് സാമ്പത്തിക ആശ്വാസം നൽകുന്നതാണ് ഈ പദ്ധതി.

സ്ത്രീ തൊഴിലാളികളുടെ സൗകര്യങ്ങൾ വർധിപ്പിക്കുന്നതിനായി സ്ത്രീ സൗഹൃദ അടിസ്ഥാന സൗകര്യ വികസന പദ്ധതിയും നടപ്പാക്കുന്നു. ഫാക്ടറികളിലെ ശുചിത്വം, വിശ്രമ സൗകര്യങ്ങൾ, മറ്റ് അടിസ്ഥാന സൗകര്യങ്ങൾ മെച്ചപ്പെടുത്തുന്നതിനായി ഒരു യൂണിറ്റിന് പരമാവധി 40 ലക്ഷം രൂപ വരെ ധനസഹായം ലഭിക്കും.

കശുവണ്ടി ഷെല്ലിംഗ് യൂണിറ്റുകളുടെ യന്ത്രവൽക്കരണത്തിനായി പുതുതായി നടത്തുന്ന സ്ഥിര നിക്ഷേപങ്ങൾക്ക് ചെലവാകുന്ന തുകയുടെ 50 ശതമാനം വരെ സർക്കാർ സഹായം നൽകും. ഇതിന് പരമാവധി 40 ലക്ഷം രൂപയാണ് അനുവദിക്കുക. ഇതുവഴി ഉൽപ്പാദനക്ഷമത വർധിപ്പിക്കുകയും തൊഴിലിടങ്ങളിലെ സുരക്ഷ മെച്ചപ്പെടുത്തുകയും ചെയ്യുമെന്നാണ് പ്രതീക്ഷ.
താൽപ്പര്യമുള്ള കശുവണ്ടി ഫാക്ടറി ഉടമകൾ ബന്ധപ്പെട്ട ജില്ലാ വ്യവസായ കേന്ദ്രത്തിൽ അപേക്ഷകൾ സമർപ്പിക്കണം. കൂടുതൽ വിവരങ്ങൾക്ക് ഫോൺ: 0474 2748395.