തിരുവനന്തപുരം: കേരള കോൺഗ്രസ് (എം) ഇടതുപക്ഷ ജനാധിപത്യ മുന്നണിയിൽ തന്നെ തുടരുമെന്ന് പാർട്ടി ചെയർമാൻ ജോസ് കെ. മാണി വ്യക്തമാക്കി. മുന്നണി മാറുമെന്ന തരത്തിലുള്ള പ്രചാരണങ്ങൾ അടിസ്ഥാനരഹിതമാണെന്നും പുറത്തു നടക്കുന്ന ചർച്ചകൾക്ക് പ്രസക്തിയില്ലെന്നും അദ്ദേഹം പറഞ്ഞു.
തങ്ങളുടെ രാഷ്ട്രീയ നിലപാട് വ്യക്തമായി ഇടതുപക്ഷത്തിനൊപ്പമാണെന്നും, കേരള കോൺഗ്രസിനെക്കുറിച്ച് ആരും അനാവശ്യമായി ആശങ്കപ്പെടേണ്ടതില്ലെന്നും ജോസ് കെ. മാണി കൂട്ടിച്ചേർത്തു. കേരള കോൺഗ്രസ് എവിടെയുണ്ടോ അവിടെയെല്ലാം ഭരണം ഉണ്ടാകുമെന്നും അദ്ദേഹം ആത്മവിശ്വാസം പ്രകടിപ്പിച്ചു.
മുന്നണി വിടണമെന്ന അഭിപ്രായം പാർട്ടിക്കുള്ളിൽ ചിലർക്കുണ്ടെന്ന കാര്യത്തിൽ അദ്ദേഹം സ്ഥിരീകരണം നൽകിയില്ല. എന്നാൽ പാർട്ടി ഐക്യത്തോടെ ഒറ്റക്കെട്ടായി മുന്നോട്ടുപോകുകയാണെന്നും ആഭ്യന്തര ഭിന്നതകളില്ലെന്നും ജോസ് കെ. മാണി പറഞ്ഞു.
കേന്ദ്ര സർക്കാരിനെതിരായ പ്രതിഷേധങ്ങളിൽ കേരള കോൺഗ്രസ് (എം) പങ്കെടുക്കാത്തത് വ്യക്തിപരമായ അസൗകര്യങ്ങൾ മൂലമാണെന്നും, ഇക്കാര്യം മുൻകൂട്ടി ഇടതുപക്ഷ ജനാധിപത്യ മുന്നണിയെ അറിയിച്ചിരുന്നുവെന്നും അദ്ദേഹം വ്യക്തമാക്കി. ഇതുമായി ബന്ധപ്പെട്ട് മുന്നണിയുമായി യാതൊരു അഭിപ്രായവ്യത്യാസവും ഇല്ലെന്നും ജോസ് കെ. മാണി പറഞ്ഞു.
