കോഴിക്കോട്: ആനക്കാംപൊയിലിൽ ഓട്ടോറിക്ഷ വൈദ്യുതി പോസ്റ്റിലിടിച്ച് മറിഞ്ഞുണ്ടായ അപകടത്തിൽ ദമ്പതികൾ മരിച്ചു. തിരുവമ്പാടി ആനക്കാംപൊയിലിലെ പുത്തൻപുരയിൽ ഷിജു ജോസഫ് (49), ഭാര്യ ബിൻസി (41) എന്നിവരാണ് മരിച്ചത്.

ഇന്ന് രാവിലെ 9 മണിയോടെ ആനക്കാംപൊയിൽ–പുല്ലൂരാംപാറ റോഡിൽ തേക്കിൻ തോട്ടത്തിന് സമീപമാണ് അപകടം സംഭവിച്ചത്. ഭാര്യ ബിൻസിയെ ജോലിസ്ഥലത്തേക്ക് കൊണ്ടുപോകുന്നതിനിടെ ഷിജു ഓടിച്ചിരുന്ന ഓട്ടോറിക്ഷ നിയന്ത്രണം വിട്ട് വൈദ്യുതി പോസ്റ്റിൽ ഇടിച്ച് മറിഞ്ഞതായാണ് വിവരം.

അപകടം നടന്നതുടർന്ന് നാട്ടുകാർ ഓടിയെത്തി ഇരുവരെയും ഉടൻ ഓമശ്ശേരിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മരിച്ച ഷിജു തന്നെയായിരുന്നു ഓട്ടോറിക്ഷയുടെ ഉടമ.

ദമ്പതികൾക്ക് അതുൽ, അമേയ എന്ന രണ്ടു മക്കളുണ്ട്; ഇരുവരും വിദ്യാർത്ഥികളാണ്. പോലീസ് സംഭവത്തിൽ അന്വേഷണം ആരംഭിച്ചിട്ടുണ്ട്.