ആലപ്പുഴ ജില്ലയിലെ ചേർത്തല കെ.എസ്.ആർ.ടി.സി ഡിപ്പോയിൽ നിന്നും ആരംഭിക്കുന്ന രണ്ട് പുതിയ ദീർഘദൂര ബസ് സർവീസുകളുടെ ഉദ്ഘാടനം മാർച്ച് 2-ാം തീയതി തിങ്കളാഴ്ച രാവിലെ നടക്കും.

കെ.എസ്.ആർ.ടി.സി ഒരുക്കുന്ന തിരുനെല്ലി ക്ഷേത്രത്തിലേക്കുള്ള സൂപ്പർ ഫാസ്റ്റ് സർവീസ് തുറവൂർ മഹാക്ഷേത്രം പരിസരത്ത് വെച്ച് രാവിലെ 7.00 മണിക്ക് ഫ്ലാഗ് ഓഫ് ചെയ്യും. അതേസമയം, അരൂക്കുറ്റിയിൽ നിന്നും തിരുവനന്തപുരം നഗരത്തിലേക്കുള്ള ഫാസ്റ്റ് പാസഞ്ചർ സർവീസ് രാവിലെ 8.30 മണിക്ക് അരൂക്കുറ്റിയിൽ വെച്ച് ഫ്ലാഗ് ഓഫ് ചെയ്യും.

തിരുനെല്ലി ക്ഷേത്രത്തിലേക്കുള്ള സർവീസ് എറണാകുളം, തൃശൂർ, കോഴിക്കോട്, വടകര, തലശ്ശേരി, കൊട്ടിയൂർ ക്ഷേത്രം, മാനന്തവാടി എന്നിവ വഴിയാണ് ക്രമീകരിച്ചിരിക്കുന്നത്. രാവിലെ 5.00 മണിക്ക് ചേർത്തലയിൽ നിന്നും പുറപ്പെടുന്ന ബസ് വൈകിട്ട് 5.10 മണിക്ക് തിരുനെല്ലി ക്ഷേത്രംയിൽ എത്തിച്ചേരും. പിറ്റേന്ന് രാവിലെ 6.00 മണിക്ക് തിരുനെല്ലിയിൽ നിന്നും പുറപ്പെട്ട് വൈകുന്നേരം 6.10 മണിക്ക് ചേർത്തലയിൽ തിരിച്ചെത്തും.

തിരുവനന്തപുരം ഫാസ്റ്റ് പാസഞ്ചർ സർവീസ് രാവിലെ 6.00 മണിക്ക് ചേർത്തലയിൽ നിന്നും അരൂക്കുറ്റിയിലേക്ക് പുറപ്പെടും. തുടർന്ന് രാവിലെ 7.00 മണിക്ക് അരൂക്കുറ്റിയിൽ നിന്നും ചേർത്തല, അലപ്പുഴ, കൊല്ലം എന്നിവ വഴിയായി ഉച്ചയ്ക്ക് 1.20 മണിക്ക് തിരുവനന്തപുരത്ത് എത്തിച്ചേരും. തിരികെ വൈകിട്ട് 3.45 മണിക്ക് തിരുവനന്തപുരത്ത് നിന്നും പുറപ്പെട്ട് രാത്രി 8.55 മണിക്ക് ചേർത്തലയിൽ എത്തും.