ന്യൂഡൽഹി ∙ 2023 ലെ ദാദാസാഹിബ് ഫാൽക്കെ അവാർഡ് മലയാളത്തിന്റെ സൂപ്പർസ്റ്റാർ മോഹൻലാലിന് ലഭിച്ചു. നാല് പതിറ്റാണ്ടിലേറെ നീണ്ടുനിൽക്കുന്ന  കരിയറിലുടനീളം ഇന്ത്യൻ സിനിമയ്ക്കു നൽകിയ “പ്രതീകാത്മക സംഭാവന”കളെ മാനിച്ചാണ് പുരസ്‌കാരം.
വിവര-പ്രസാരണ മന്ത്രാലയമാണ് സെപ്റ്റംബർ 20, 2025-ന് ഔദ്യോഗികമായി പ്രഖ്യാപിച്ചത്. ദാദാസാഹിബ് ഫാൽക്കെ അവാർഡ് സെലക്ഷൻ കമ്മിറ്റിയുടെ ശുപാർശയെ തുടർന്നാണ് തീരുമാനം. വരുന്ന സെപ്റ്റംബർ 23-ന് നടക്കുന്ന 71-ാമത് ദേശീയ ചലച്ചിത്ര പുരസ്‌കാര വിതരണച്ചടങ്ങിൽ അവാർഡ് സമ്മാനിക്കും.

“കമ്പ്ലീറ്റ് ആക്ടർ” എന്നറിയപ്പെടുന്ന മോഹൻലാൽ മലയാളം, തമിഴ്, തെലുങ്ക്, ഹിന്ദി തുടങ്ങി വിവിധ ഭാഷകളിലായി 360-ത്തിലധികം ചിത്രങ്ങളിൽ അഭിനയിച്ചിട്ടുണ്ട്. 2001-ൽ പത്മശ്രീയും 2019-ൽ പത്മഭൂഷണും ലഭിച്ച മോഹൻലാൽ അഞ്ച് ദേശീയ ചലച്ചിത്ര പുരസ്‌കാരങ്ങൾക്കും നിരവധി കേരള സംസ്ഥാന ചലച്ചിത്ര അവാർഡുകൾക്കും അർഹനായിട്ടുണ്ട്.

കേരളത്തിൽ നിന്നുള്ള രണ്ടാമത്തെ വ്യക്തിയാണ് മോഹൻലാൽ ഈ ബഹുമതി നേടുന്നത്. ഇതിനു മുൻപ് പ്രശസ്ത സംവിധായകൻ അടൂർ ഗോപാലകൃഷ്ണനാണ് ഈ പുരസ്‌കാരം സ്വന്തമാക്കിയത്.