നിലമ്പൂർ – ഷൊർണൂർ റെയിൽവേ പാതയിൽ യാത്ര ചെയ്യുന്നവരുടെ ദീർഘകാലത്തെ ആവശ്യം യാഥാർത്ഥ്യമാക്കി, നിലമ്പൂരിലെ പുതിയ റെയിൽവേ അടിപ്പാത പൊതുജനങ്ങൾക്ക് തുറന്നു. വർഷങ്ങളായി റെയിൽവേ ഗേറ്റ് അടച്ചിടുന്നതിനെ തുടർന്ന് പ്രദേശത്ത് രൂപപ്പെട്ട ഗതാഗത തടസ്സങ്ങൾക്ക് ശാശ്വത പരിഹാരമാണ് പുതിയ അടിപ്പാത നൽകുന്നത്.

അവസാന ഘട്ട പ്രവൃത്തികൾ പൂർത്തിയാക്കിയ ശേഷമാണ് അടിപ്പാത പ്രവർത്തനം ആരംഭിച്ചത്. ഇതോടെ നിലമ്പൂർ നഗരത്തിലും പരിസര പ്രദേശങ്ങളിലും ഗതാഗത കുരുക്ക് കാര്യമായ തോതിൽ കുറയും എന്ന് പ്രതീക്ഷിക്കപ്പെടുന്നു.

കേരള റെയിൽ ഡവലപ്‌മെന്റ് കോർപ്പറേഷൻ ലിമിറ്റഡ് (കെ-റെയിൽ) നേതൃത്വത്തിൽ സർക്കാരിന്റെ ലെവൽ ക്രോസ് ഇല്ലാത്ത കേരളം പദ്ധതിയുടെ ഭാഗമായി ആണ് അടിപ്പാത നിർമ്മിച്ചത്. സംസ്ഥാന സർക്കാരും റെയിൽവേയും ചേർന്ന് ഏകദേശം 13 കോടി രൂപ ചെലവഴിച്ചാണ് നിർമാണം പൂർത്തിയായത്.