പത്തനംതിട്ട: അച്ചൻകോവിൽ–അലിമുക്ക് റോഡിൽ ഉച്ചകഴിഞ്ഞ് 3 മണിക്ക് ശേഷം കാൽനടയാത്ര അനുവദനീയമല്ലെന്നും, തുര കല്ലേലിൽ വഴിയുള്ള യാത്ര രാവിലെ 6.30ന് ശേഷമാത്രമേ അനുവദിക്കൂ എന്നും വനം വകുപ്പ് അധികൃതർ അറിയിച്ചു. അച്ചൻകോവിൽ ഫോറസ്റ്റ് ഡിവിഷനിൽ നിന്നുള്ള ഏറ്റവും പുതിയ വിവരങ്ങളുടെ അടിസ്ഥാനത്തിലാണ് നിയന്ത്രണങ്ങൾ ഏർപ്പെടുത്തിയിരിക്കുന്നത്.
വേനൽക്കാലത്ത് വന്യമൃഗങ്ങൾ വെള്ളത്തിനായി പ്രധാനമായും നദികളെ ആശ്രയിക്കുന്ന സാഹചര്യത്തിലാണ് ഈ തീരുമാനം. അച്ചൻകോവിൽ–അലിമുക്ക് റോഡ് നദിയുടെ സമീപത്തുകൂടി കടന്നുപോകുന്നതിനാൽ വന്യമൃഗങ്ങളുടെ സാന്നിധ്യം കൂടുതലായി അനുഭവപ്പെടുന്ന പ്രദേശമാണിതെന്ന് വനം വകുപ്പ് വ്യക്തമാക്കി.
അച്ചൻകോവിൽ ക്ഷേത്രത്തിൽ നിന്ന് ശബരിമലയിലേക്ക് കാൽനടയായി യാത്ര ചെയ്യുന്ന അയ്യപ്പഭക്തർ അതീവ ജാഗ്രത പാലിക്കണമെന്ന് അധികൃതർ നിർദേശിച്ചു. ഫോറസ്റ്റ് പട്രോളിംഗ് ശക്തമാക്കിയിട്ടുണ്ടെങ്കിലും, വന്യമൃഗങ്ങൾ പതിവായി ഇറങ്ങുന്ന ചില ഭാഗങ്ങൾ ഇപ്പോഴും നിലവിലുണ്ടെന്നും, അതിനാൽ യാത്രക്കാർ സമയം കൃത്യമായി പാലിച്ച് സുരക്ഷാ നിർദേശങ്ങൾ അനുസരിക്കണമെന്നും വനം വകുപ്പ് ഉദ്യോഗസ്ഥർ അറിയിച്ചു.
നിയന്ത്രണങ്ങൾ ലംഘിച്ച് യാത്ര ചെയ്യുന്നത് അപകടസാധ്യത വർധിപ്പിക്കുമെന്നും, പൊതുജനങ്ങളുടെ സുരക്ഷ മുൻനിർത്തിയാണ് നടപടികളെന്നും അധികൃതർ കൂട്ടിച്ചേർത്തു.
