മോസ്‌കോ: ആഗോള ഊർജ വിപണിയിലെ അനിശ്ചിതത്വവും വിലസ്ഥിരതക്കുറവും നേരിടുന്നതിനായി, ഏപ്രിൽ 1 മുതൽ പെട്രോൾ കയറ്റുമതിക്ക് നിരോധനം ഏർപ്പെടുത്തുമെന്ന് റഷ്യ പ്രഖ്യാപിച്ചു. എന്നാൽ ഇത് ഇത് ശുദ്ധീകരിച്ച ഗ്യാസോലിനു മേലുള്ള താൽക്കാലിക കയറ്റുമതി നിയന്ത്രണമാണ്, അസംസ്കൃത എണ്ണയുടെയോ എല്ലാ പെട്രോളിയം ഉൽപ്പന്നങ്ങളുടെയോ നിരോധനമല്ല.ആഭ്യന്തര ഇന്ധന ലഭ്യത ഉറപ്പാക്കുകയും വില നിയന്ത്രിക്കുകയും ചെയ്യുന്നതാണ് പ്രധാന ലക്ഷ്യം.

ഉയർന്നതല യോഗത്തിന് ശേഷമാണ് തീരുമാനം ഉണ്ടായത്. ഉപപ്രധാനമന്ത്രി അലക്സാണ്ടർ നവാക്ക് ഊർജ മന്ത്രാലയത്തോട് കയറ്റുമതി നിരോധന ഉത്തരവ് തയ്യാറാക്കാൻ നിർദ്ദേശം നൽകിയതായി സർക്കാർ വ്യക്തമാക്കി.

മുമ്പ് വ്യാപാരികളായ നോൺ-പ്രൊഡ്യൂസർമാർക്ക് മാത്രമായി ഉണ്ടായിരുന്ന നിയന്ത്രണം ഇപ്പോൾ ഉൽപ്പാദകരെയും ഉൾപ്പെടുത്തി വ്യാപിപ്പിച്ചിരിക്കുകയാണ്. ഇത് കൂടുതൽ വ്യാപകമായ കയറ്റുമതി നിയന്ത്രണമായി മാറും. ജൂലൈ 31 വരെ നിരോധനം തുടരുമെന്നാണു റിപ്പോർട്ടുകൾ, എങ്കിലും കാലാവധി അന്തിമമായി തീരുമാനിച്ചിട്ടില്ല.

ആഗോള എണ്ണ വിപണിയിലെ അസ്ഥിരതയാണ് ഈ തീരുമാനത്തിന് പ്രധാന കാരണം. പശ്ചിമേഷ്യയിലെ സംഘർഷം മൂലം എണ്ണവിലയിൽ വലിയ മാറ്റങ്ങൾ സംഭവിച്ചുകൊണ്ടിരിക്കുകയാണ്. ഈ സാഹചര്യത്തിൽ ആഭ്യന്തര ആവശ്യങ്ങൾ സംരക്ഷിക്കാനാണ് റഷ്യയുടെ നീക്കം.

ആഭ്യന്തര വിപണിയിൽ ഇന്ധന ക്ഷാമം ഒഴിവാക്കാനും വില ഉയർച്ച നിയന്ത്രിക്കാനുമായി റഷ്യ മുമ്പും ഇത്തരത്തിലുള്ള താൽക്കാലിക നിയന്ത്രണങ്ങൾ ഏർപ്പെടുത്തിയിട്ടുണ്ട്. ആവശ്യകത വർധിക്കുന്ന സമയങ്ങളിലും റിഫൈനറി പ്രശ്നങ്ങളുണ്ടാകുമ്പോഴും ഇത്തരം നടപടികൾ സ്വീകരിച്ചിട്ടുണ്ട്.

ഇതിനിടെ, റഷ്യയുടെ ഊർജ അടിസ്ഥാന സൗകര്യങ്ങൾക്കും വെല്ലുവിളികൾ നേരിടുകയാണ്. അടുത്തിടെ നടന്ന ഉക്രൈനിൽ നിന്നുള്ള ഡ്രോൺ ആക്രമണം മൂലം റഷ്യയിലെ റിഫൈനറി പ്രവർത്തനങ്ങൾക്കും കയറ്റുമതി സംവിധാനങ്ങൾക്കും വലിയ പ്രശ്നങ്ങൾ ഉണ്ടായിട്ടുണ്ട്.

പെട്രോൾ കയറ്റുമതിക്ക് നിരോധനം ഏർപ്പെടുത്തിയിട്ടുണ്ടെങ്കിലും, റഷ്യ ക്രൂഡ് ഓയിൽ കയറ്റുമതി തുടരും. പാശ്ചാത്യ രാജ്യങ്ങളുടെ ഉപരോധങ്ങളെ തുടർന്ന് ഈ കയറ്റുമതിയുടെ വലിയൊരു ഭാഗം ഏഷ്യൻ രാജ്യങ്ങളിലേക്കാണ് തിരിച്ചുവിടുന്നത്.

ആഭ്യന്തര ഉപഭോക്താക്കളുടെയും വ്യവസായങ്ങളുടെയും ആവശ്യങ്ങൾ നിറവേറ്റുന്നതിനൊപ്പം, ജിയോപൊളിറ്റിക്കൽ സമ്മർദ്ദങ്ങൾ കൈകാര്യം ചെയ്യുന്നതിനുള്ള തന്ത്രത്തിന്റെ ഭാഗമായാണ് ഈ നീക്കമെന്ന് വിശകലനക്കാർ വിലയിരുത്തുന്നു. നിലവിൽ ഡീസൽ പോലുള്ള മറ്റ് പെട്രോളിയം ഉൽപ്പന്നങ്ങൾക്ക് ഈ നിരോധനം ബാധകമല്ല.

സ്ഥിതി നിരന്തരം നിരീക്ഷിച്ചുകൊണ്ടിരിക്കുകയാണെന്നും ആവശ്യമായ മാറ്റങ്ങൾ പിന്നീട് വരുത്താമെന്നും റഷ്യൻ അധികൃതർ വ്യക്തമാക്കി.