സ്വത്ത് തർക്കത്തെ തുടർന്നുണ്ടായ കുടുംബ വഴക്കിൽ മാവേലിക്കരയിൽ അമ്മയെ മകൻ ക്രൂരമായി കൊലപ്പെടുത്തിയ സംഭവം പ്രദേശത്തെ നടുക്കി. നഗരസഭയുടെ മുൻ വനിതാ കൗൺസിലർ കനകമ്മ സോമരാജൻ ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഏകമകൻ കൃഷ്ണദാസിനെ മാവേലിക്കര പോലീസ് അറസ്റ്റ് ചെയ്തു.
ഞായറാഴ്ച വൈകുന്നേരം സംഭവമുണ്ടായെങ്കിലും വിവരം പുറത്തറിഞ്ഞത് തിങ്കളാഴ്ച രാവിലെയാണ്. കൃഷ്ണദാസ് തന്നെയാണ് ഒരു പ്രാദേശിക നേതാവിനെ വിളിച്ച് സംഭവത്തെക്കുറിച്ച് അറിയിച്ചത്.
കനകമ്മയുടെ കഴുത്തിലെ അസ്ഥി പൊട്ടൽ, വാരിയെല്ലുകൾ പൂർണ്ണമായി ഒടിഞ്ഞ് കരൾ, ശ്വാസകോശം തുടങ്ങി ആന്തരിക അവയവങ്ങളിൽ തറച്ചു കയറിയ ഗുരുതര മുറിവുകൾ, കൂടാതെ തലയിൽ ലഭിച്ച അടിയേറ്റ് ഉണ്ടായ ആന്തരിക രക്തസ്രാവം എന്നിവയാണ് മരണത്തിന് കാരണമെന്ന് പ്രാഥമിക പരിശോധനയിൽ കണ്ടെത്തി.
കനകമ്മയും മകൻ കൃഷ്ണദാസും തമ്മിൽ ഏറെ നാളായി സ്വത്ത് സംബന്ധിച്ച തർക്കങ്ങളുണ്ടായിരുന്നു. അമ്മയുടെ പേരിലുള്ള ഭൂമി വിറ്റ് പണം തനിക്ക് നൽകണമെന്ന് കൃഷ്ണദാസ് ആവശ്യപ്പെട്ടിരുന്നു. ഈ പ്രശ്നം പരിഹരിച്ച് ഭൂമി വിൽക്കാനുള്ള രേഖകൾ തിങ്കളാഴ്ച തയ്യാറാക്കാനിരിക്കെ തന്നെയാണ് ദുരന്തകരമായ സംഭവം നടന്നത്.
തൻ്റെ വിവാഹമോചനത്തിന് അമ്മയാണ് ഉത്തരവാദിയെന്ന് കൃഷ്ണദാസ് വിശ്വസിച്ചിരുന്നതായും ഇത് ഇരുവരുടെയും കലഹം രൂക്ഷമാക്കിയിരുന്നതായും ബന്ധുക്കൾ പറയുന്നു.
