ആരോഗ്യ മേഖലയ്ക്ക് വലിയ പിന്തുണയായി, എടത്വ കമ്മ്യൂണിറ്റി ഹെൽത്ത് സെന്ററിന്റെ ഭൂമിയുടെ ഉടമസ്ഥാവകാശവുമായി ബന്ധപ്പെട്ടിരുന്ന ദീർഘകാല പ്രതിസന്ധി പരിഹാരത്തിലേക്ക് എത്തി.

വർഷങ്ങൾ മുമ്പ് എടത്വ സെന്റ് ജോർജ് ഫൊറോനാ പള്ളി വിട്ടുകൊടുത്ത സ്ഥലത്ത് പ്രവർത്തിച്ചു വരുന്ന ഹെൽത്ത് സെന്ററിന്റെ വികസനത്തിനായി ദേശീയ ആരോഗ്യ ദൗത്യം മുഖേന ₹5.5 കോടി രൂപയുടെ പദ്ധതി തയ്യാറായിരുന്നു. എന്നാൽ ഭൂമിയുടെ ഉടമസ്ഥാവകാശം പള്ളിയിൽ തുടരുന്നതിനാൽ, പദ്ധതി നടപ്പാക്കുന്നതിൽ തടസ്സം നേരിടുകയായിരുന്നു.

ഈ സാഹചര്യത്തിൽ കഴിഞ്ഞ ഓഗസ്റ്റ് 3-ാം തീയതി നടന്ന പ്രതിനിധി യോഗത്തിൽ, ചങ്ങനാശ്ശേരി അതിരൂപത ഭൂമിയുടെ ഉടമസ്ഥാവകാശം സംസ്ഥാന സർക്കാരിലേക്ക് സൗജന്യമായി കൈമാറാൻ തീരുമാനിച്ചു.
എടത്വ പ്രദേശത്തിന്റെ പുരോഗതിക്കായി എടുത്ത ഈ ചരിത്രപരമായ തീരുമാനം വലിയ നേട്ടമായി വിലയിരുത്തപ്പെടുന്നു.
അതിരൂപതാ മെത്രാപ്പോലീത്ത അഭിവന്ദ്യ മാർ തോമസ് തറയിൽ പിതാവ്, പള്ളി വികാരി ഫാ. ഫിലിപ്പ് വൈക്കത്തുകാരൻ, പള്ളി കമ്മിറ്റിയും വിശ്വാസികളും ഒരുമിച്ച് എടുത്ത തീരുമാനം നാട്ടുകാരുടെ ആരോഗ്യ സൗകര്യങ്ങൾക്ക് വഴിത്തിരിവായിരിക്കുമെന്ന് പ്രതീക്ഷിക്കുന്നു.

കരാർ നടപ്പിലായാൽ എടത്വ ജനങ്ങൾക്ക് നിലവാരമേറിയ ആരോഗ്യ സേവനങ്ങൾ ഉറപ്പാക്കുകയും, ദേശീയ ആരോഗ്യ ദൗത്യം മുഖേന അനുവദിച്ചിട്ടുള്ള പദ്ധതികൾ തടസ്സമില്ലാതെ നടപ്പാക്കാൻ സാധിക്കുകയും ചെയ്യും.