ആലപ്പുഴ: ആലപ്പുഴ ഗവൺമെൻറ് മെഡിക്കൽ കോളജിൽ ശസ്ത്രക്രിയ നടത്തിയ വീട്ടമ്മയുടെ വയറിനുള്ളിൽ കത്രിക കുടുങ്ങിയ സംഭവം നിർഭാഗ്യകരമാണെന്ന് പ്രിൻസിപ്പൽ ഡോ. പദ്മകുമാർ പ്രതികരിച്ചു. കോവിഡ് കാലഘട്ടത്തിലാണ് ബന്ധപ്പെട്ട ശസ്ത്രക്രിയ നടന്നതെന്നും, തുടർന്ന് നടത്തിയ എക്സ്റേ പരിശോധനയിലാണ് മെഡിക്കൽ ഉപകരണം വയറിനുള്ളിൽ കണ്ടെത്തിയതെന്നും അദ്ദേഹം അറിയിച്ചു.
സംഭവത്തിന്റെ ഗൗരവസ്വഭാവം കണക്കിലെടുത്ത് രോഗിയെ വീണ്ടും അഡ്മിറ്റ് ചെയ്യാൻ ആവശ്യപ്പെട്ടിരുന്നുവെങ്കിലും ഉഷ അത് അംഗീകരിച്ചില്ലെന്നും പ്രിൻസിപ്പൽ വ്യക്തമാക്കി.
സംഭവത്തെക്കുറിച്ച് വിശദമായി അന്വേഷിക്കുന്നതിനായി വിദഗ്ധരുടെ നാലംഗ സമിതി രൂപീകരിച്ചിട്ടുണ്ട്. അന്വേഷണ റിപ്പോർട്ട് ലഭിക്കുന്നതോടെ അത് സർക്കാർക്ക് സമർപ്പിക്കുമെന്നും, ഏതെങ്കിലും തരത്തിലുള്ള വീഴ്ചകൾ കണ്ടെത്തിയാൽ സർക്കാർ നിർദേശപ്രകാരം ആവശ്യമായ നടപടികൾ മെഡിക്കൽ കോളേജ് അധികൃതർ സ്വീകരിക്കുമെന്നും പ്രിൻസിപ്പൽ അറിയിച്ചു.
