വിഴിഞ്ഞം | വിഴിഞ്ഞം അന്താരാഷ്ട്ര തുറമുഖത്തിന്റെ തുടർഘട്ട വികസന പ്രവർത്തനങ്ങളുടെ നിർമ്മാണോദ്ഘാടനം ബഹുമാനപ്പെട്ട മുഖ്യമന്ത്രി ശ്രീ പിണറായി വിജയൻ നിർവഹിച്ചു. കേരളത്തിന്റെ സമഗ്ര വികസനത്തിൽ നിർണായക പങ്ക് വഹിക്കുന്ന വിഴിഞ്ഞം തുറമുഖം രാജ്യത്തിന്റെ പ്രധാന അന്താരാഷ്ട്ര ട്രാൻഷിപ്പ്മെന്റ് ഹബ്ബായി മാറുന്ന ദിശയിലാണ് മുന്നേറുന്നതെന്ന് മുഖ്യമന്ത്രി പറഞ്ഞു.
ഏകദേശം 10,000 കോടി രൂപയുടെ നിക്ഷേപം വഴി വിഴിഞ്ഞം തുറമുഖത്തിന്റെ കൈകാര്യം ചെയ്യാനുള്ള ശേഷി പ്രതിവർഷം 57 ലക്ഷം കണ്ടെയ്നറുകളായി വർധിപ്പിക്കുകയാണ് ലക്ഷ്യം. വികസന പ്രവർത്തനങ്ങൾ പൂർത്തിയാകുന്നതോടെ ഇന്ത്യയിലെ ഏറ്റവും ആധുനിക തുറമുഖങ്ങളിലൊന്നായി വിഴിഞ്ഞം മാറും.
28,000 TEU വരെ ശേഷിയുള്ള ലോകത്തിലെ അടുത്ത തലമുറ കപ്പലുകളെ സ്വീകരിക്കാൻ വിഴിഞ്ഞം തുറമുഖം സജ്ജമാകുന്നതായും അധികൃതർ അറിയിച്ചു. ഇത് ആഗോള കപ്പൽഗതാഗത രംഗത്ത് വിഴിഞ്ഞത്തിന് വലിയ മത്സരാധിക്യം നൽകും.
അതിവേഗ വികസനമാണ് പദ്ധതിയുടെ പ്രത്യേകത. ആദ്യഘട്ടത്തിൽ നിശ്ചയിച്ച സമയപരിധിയേക്കാൾ 17 വർഷം മുൻപായി, 2028 ഓടെ മുഴുവൻ വികസന പ്രവർത്തനങ്ങളും പൂർത്തിയാക്കാനാകുമെന്ന് അധികൃതർ വ്യക്തമാക്കി.
കേരളത്തിന്റെ സാമ്പത്തിക വളർച്ചക്കും തൊഴിലവസര സൃഷ്ടിക്കും വലിയ ഉത്തേജനം നൽകുന്ന പദ്ധതിയാണ് വിഴിഞ്ഞം തുറമുഖമെന്നും, സംസ്ഥാനത്തിന്റെ ഭാവി വികസനത്തിൽ ഇതിന് നിർണായക സ്ഥാനമുണ്ടാകുമെന്നും മുഖ്യമന്ത്രി പറഞ്ഞു.
