ദുബായ്: ദുബായ് മരിനയിലെ 67 നിലയുള്ള ടൈഗർ ടവറിൽ (മറീന പിനാക്കിൾ) വെള്ളിയാഴ്ച രാത്രി വലിയ തീപിടിത്തം ഉണ്ടായി. രാത്രി 9:30ഓടെ മുകളിലത്തെ നിലകളിൽ തീപടർന്ന് നിരവധി നിലകളിലേക്ക് കത്തി പടർന്നു. തീപിടിത്തം ആരംഭിച്ച ഉടൻ തന്നെ അടിയന്തര രക്ഷാപ്രവർത്തനം ആരംഭിച്ച ദുബായ് സിവിൽ ഡിഫൻസ് സംഘം ആറു മണിക്കൂർ നീണ്ട പരിശ്രമത്തിനൊടുവിലാണ് തീ നിയന്ത്രണ വിധേയമാക്കിയത്.

ടവറിൽ നിന്നുള്ള 3,820 താമസക്കാരെ സുരക്ഷിതമായി ഒഴിപ്പിച്ചു. ആർക്കും പരിക്കോ മരണമോ സംഭവിച്ചിട്ടില്ലെന്ന് അധികൃതർ അറിയിച്ചു. രക്ഷാപ്രവർത്തനത്തിനായി ആംബുലൻസ്, മെഡിക്കൽ, മാനസികാരോഗ്യ സഹായ സംഘങ്ങൾ സ്ഥലത്തെത്തിയിരുന്നു. താമസക്കാർക്ക് താൽക്കാലിക താമസ സൗകര്യം ഒരുക്കാൻ അധികൃതർ നിർദേശം നൽകി.

തീപിടിത്തത്തിന്റെ കാരണം ഇപ്പോഴും അന്വേഷിച്ചുവരികയാണ്. തീപിടിത്തം നിയന്ത്രിക്കാൻ സഹായിക്കുന്നതിനായി ദുബായ് ട്രാൻസ്പോർട്ട് അതോറിറ്റി മരിനയും പാം ജുമൈറയുമിടയിലെ മെട്രോ സർവീസ് താൽക്കാലികമായി നിർത്തിവെച്ചിരുന്നു. ദുബായിൽ അടുത്തകാലത്തുണ്ടായ ഏറ്റവും വലിയ തീപിടിത്തങ്ങളിൽ ഒന്നാണിത്, എന്നാൽ സമയബന്ധിതമായ രക്ഷാപ്രവർത്തനങ്ങൾ മൂലം വലിയ ദുരന്തം ഒഴിവാക്കാൻ സാധിച്ചു.