സൂറത്ത്— ദീപാവലിയും ഛഠ് പൂജയും ആഘോഷിക്കാൻ സ്വന്തം നാട്ടിലേക്ക് മടങ്ങാൻ ശ്രമിക്കുന്ന ആയിരക്കണക്കിന് പ്രവാസി തൊഴിലാളികൾ സൂറത്തിലെ ഉധ്ന റെയിൽവേ സ്റ്റേഷനിൽ മണിക്കൂറുകളോളം കിലോമീറ്ററുകൾ നീണ്ട ക്യൂവിൽ കാത്തുനിൽക്കേണ്ടി വന്നു. രണ്ട് കിലോമീറ്ററോളം നീളമുള്ള ക്യു സ്റ്റേഷനിൽ നിന്ന് സമീപത്തെ താമസ മേഖലകളിലേക്കും വ്യാപിച്ചു.

വനിതകളും കുട്ടികളുമുൾപ്പെടെ നിരവധി പേർ 12 മുതൽ 18 മണിക്കൂർ വരെ തുറസായ നിലത്തിൽ ഇരുന്ന്, വെള്ളമില്ലാതെ, ഭക്ഷണമില്ലാതെ കാത്തുനിന്നതായി റിപ്പോർട്ടുകൾ പറയുന്നു. കനത്ത ചൂടിൽ യാത്രക്കാർ ക്ഷീണത്തിലും ദാഹത്തിലും അലയുകയായിരുന്നു.

പെരുകിയ തിരക്ക് കൈകാര്യം ചെയ്യുന്നതിനായി  റെയിൽവേ ഒക്ടോബർ 15 മുതൽ 31 വരെ ഉധ്ന ഉൾപ്പെടെയുള്ള പ്രധാന സ്റ്റേഷനുകളിൽ പ്ലാറ്റ്‌ഫോം ടിക്കറ്റുകൾക്ക് നിയന്ത്രണം ഏർപ്പെടുത്തിയിരുന്നു. കൂടാതെ, ഒക്ടോബർ 20-ന് 12 മണിക്കൂറിനുള്ളിൽ 21 പ്രത്യേക ട്രെയിനുകൾ കൂടി സർവീസ് ആരംഭിച്ച് 36,000-ത്തിലധികം യാത്രക്കാരെ ഉത്തർപ്രദേശ്, ബിഹാർ സംസ്ഥാനങ്ങളിലേക്ക് അയച്ചു.

റെയിൽവേ പ്രൊട്ടക്ഷൻ ഫോഴ്‌സ് (RPF) അടക്കമുള്ള സുരക്ഷാസേനകളും ഗവൺമെന്റ് റെയിൽവേ പൊലീസ് (GRP) ഉദ്യോഗസ്ഥരും തിരക്ക് നിയന്ത്രിക്കാൻ വിന്യസിക്കപ്പെട്ടു. ദീർഘനേരം കാത്തുനിൽക്കുന്നവർക്കായി പോലീസ് വെള്ളം, ഭക്ഷണപ്പൊതികൾ, എനർജി ഡ്രിങ്കുകൾ എന്നിവ വിതരണം ചെയ്തു.

എന്നിരുന്നാലും, യാത്രക്കാർ ട്രെയിനുകളിൽ ആവശ്യത്തിന് സ്ഥലം ഇല്ലെന്നും കാര്യമായ ക്രമീകരണങ്ങളില്ലെന്നും ആരോപിച്ചു. “ഞങ്ങൾ ഇന്നലെ രാത്രി മുതൽ കാത്തിരിക്കുകയാണ്, ഏത് ട്രെയിനിലാണ് പോകേണ്ടതെന്ന് ആരും വ്യക്തമാക്കുന്നില്ല,” എന്ന് ഉത്തർപ്രദേശിലെ ജൗൻപൂരിൽ നിന്നുള്ള ഒരാൾ പറഞ്ഞു.

റെയിൽവേ അധികൃതർ ഈ വർഷം അസാധാരണമായ തിരക്കാണുണ്ടായതെന്ന് അംഗീകരിക്കുകയും, ഒക്ടോബർ അവസാനവരെ ആഘോഷകാലയളവിൽ യാത്ര ചെയ്യാനിരിക്കുന്നവർ മുൻകൂട്ടി യാത്രാ പദ്ധതി തയ്യാറാക്കണമെന്ന് അഭ്യർത്ഥിക്കുകയും ചെയ്തു.