വാഷിങ്ടൺ ഡി.സി: ഹാലോവീൻ വാരാന്ത്യത്തിൽ ഭീകരാക്രമണം നടത്താനുള്ള ശ്രമം പരാജയപ്പെടുത്തിക്കൊണ്ട് മിഷിഗണിൽ നിരവധി പേരെ അറസ്റ്റ് ചെയ്തതായി എഫ്‌ബിഐ ഡയറക്ടർ കാശ് പട്ടേൽ വെള്ളിയാഴ്ച വൈകിട്ട് പ്രഖ്യാപിച്ചു. ഫെഡറൽ, സംസ്ഥാന, പ്രാദേശിക ഏജൻസികളുടെ സംയുക്ത ഓപ്പറേഷനിലൂടെയായിരുന്നു ഈ വൻ ഭീകരശ്രമം തകർത്തത്. പൊതുയോഗങ്ങൾക്കും കുട്ടികളുടെ ട്രിക്ക്-ഓർ-ട്രീറ്റ് പരിപാടികൾക്കും നേരെയായിരുന്നു ഈ ഗൂഢാലോചന.

“ഫെഡറൽ, സംസ്ഥാന, പ്രാദേശിക നിയമസംരക്ഷണ ഏജൻസികൾ തമ്മിലുള്ള വേഗത്തിലുള്ള സഹകരണം മൂലമാണ് ഈ  ഭീഷണി  തടഞ്ഞത്,” എന്ന് പട്ടേൽ വാഷിങ്ടൺ എഫ്‌ബിഐ ആസ്ഥാനത്ത് മാധ്യമങ്ങളോട് പറഞ്ഞു.
ഒക്ടോബർ 31 എന്ന തീയതി തന്നെ അധികാരികൾക്ക് ആശങ്കയുണ്ടാക്കിയതാണെന്ന് അദ്ദേഹം പറഞ്ഞു — ഹാലോവീൻ ആഘോഷങ്ങളുടെ ഭാഗമായി ആയിരക്കണക്കിന് ആളുകൾ പൊതുസ്ഥലങ്ങളിൽ പങ്കെടുക്കുന്ന ദിനമായതിനാൽ.

പ്രതികളുടെയോ അവരുടെ ബന്ധങ്ങളുടെയോ വിശദാംശങ്ങൾ പട്ടേൽ പുറത്തുവിട്ടിട്ടില്ല. എങ്കിലും അന്വേഷണം തുടരുകയാണെന്നും കൂടുതൽ അറസ്റ്റ് സാധ്യതയുണ്ടെന്നും അദ്ദേഹം സൂചിപ്പിച്ചു.

മിഷിഗണിൽ ഇതിനു മുമ്പും ഇത്തരത്തിലുള്ള ഭീഷണികൾ ഉണ്ടായിട്ടുണ്ട്. 2025 മെയ് മാസത്തിൽ വാർൺ ബേസിൽ നടന്ന ഐഎസ്സ് പ്രചോദിതമായ ഭീകരശ്രമം അതിനുദാഹരണമാണ്.