തദ്ദേശ തിരഞ്ഞെടുപ്പിന്റെ ആദ്യഘട്ട വോട്ടെടുപ്പിനെ മുന്നോടിയായി പൊതുപരസ്യപ്രചാരണം നാളെ (ഡിസംബർ 7) വൈകുന്നേരം 6 മണിക്ക് അവസാനിക്കും. ഡിസംബർ 9-ന് വോട്ടെടുപ്പ് നടക്കുന്ന തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് ഈ അവസാനം ബാധകമാകുന്നത്.

പരസ്യപ്രചാരണം അവസാനിക്കുന്ന സമയത്ത് രാഷ്ട്രീയ പാർട്ടികൾ നടത്തുന്ന കൊട്ടിക്കലാശം പോലുള്ള പരിപാടികൾ സമാധാനപരമായി നടക്കണമെന്നും ക്രമസമാധാനം ലംഘിക്കപ്പെടാതിരിക്കണമെന്നും സംസ്ഥാന തിരഞ്ഞെടുപ്പ് കമ്മീഷണർ എ. ഷാജഹാൻ നിർദേശിച്ചു. പൊതുജനങ്ങൾക്ക് യാത്രാബാധ സൃഷ്ടിക്കുന്ന രീതിയിൽ സമാപന പരിപാടികൾ സംഘടിപ്പിക്കരുതെന്നും അദ്ദേഹം വ്യക്തമാക്കി.

പരസ്യപ്രചാരണത്തിന്റെ അവസാനഘട്ടത്തിൽ ഉണ്ടാകുന്ന തർക്കങ്ങൾ, വെല്ലുവിളികൾ, നിയന്ത്രണമില്ലാത്ത ശബ്ദപ്രയോഗങ്ങൾ, അതിരുകടന്ന പ്രചാരണ ഗാനങ്ങൾ എന്നിവയെ കർശനമായി നിയന്ത്രിക്കാൻ ജില്ലാ കളക്ടർമാർക്കും പോലീസിനും പ്രത്യേകം നിർദേശം നൽകിയിട്ടുണ്ട്.

മാതൃകാ പെരുമാറ്റച്ചട്ടവും ഹരിതച്ചട്ടവും പൂർണ്ണമായി പാലിക്കുന്നതായി സ്ഥാനാർഥികളും രാഷ്ട്രീയ പാർട്ടികളും ഉറപ്പുവരുത്തണമെന്ന് കമ്മീഷൻ ഓർമ്മിപ്പിച്ചു. 1951 ലെ ജനപ്രാതിനിധ്യ നിയമത്തിലെ സെക്ഷൻ 126(1) പ്രകാരം വോട്ടെടുപ്പിന് 48 മണിക്കൂർ മുമ്പ് പരസ്യപ്രചാരണം അവസാനിപ്പിക്കണമെന്ന വ്യവസ്ഥ തദ്ദേശസ്വയംഭരണ തിരഞ്ഞെടുപ്പിനും ബാധകമാണ്.