ബെംഗളൂരു: മൈസൂരു കൊട്ടാരത്തിന് മുന്നിൽ ഇന്നലെ ഉണ്ടായ ഹെലിയം സിലിണ്ടർ പൊട്ടിത്തെറി സംഭവത്തിൽ വിശദമായ അന്വേഷണം നടത്തി റിപ്പോർട്ട് സമർപ്പിക്കാൻ അധികൃതർക്ക് നിർദേശം നൽകിയതായി കര്ണാടക ആഭ്യന്തര മന്ത്രി ഡോ. ജി. പരമേശ്വർ അറിയിച്ചു.
ബെംഗളൂരുവിൽ മാധ്യമങ്ങളോട് സംസാരിക്കവെ, ഉത്തർപ്രദേശിലെ ലഖ്നൗ സ്വദേശിയായ ബലൂൺ വിൽപ്പനക്കാരൻ ഈ അപകടത്തിൽ മരണപ്പെട്ടതായി മന്ത്രി പറഞ്ഞു. ടൂറിസം വകുപ്പിലെ ഉദ്യോഗസ്ഥരുമായി ചർച്ച നടത്തിയതിന് ശേഷം ആവശ്യമായ നടപടികൾ സ്വീകരിച്ചിട്ടുണ്ടെന്നും അദ്ദേഹം അറിയിച്ചു.
അതേസമയം, ഹെലിയം സിലിണ്ടർ പൊട്ടിത്തെറി സംഭവത്തിലെ മരണസംഖ്യ രണ്ടായി ഉയർന്നു. ഗുരുതരമായി പരിക്കേറ്റ് മൈസൂരുവിലെ കെ.ആർ. ആശുപത്രിയിൽ ചികിത്സയിലായിരുന്ന നഞ്ചൻഗുഡു സ്വദേശിനിയായ മഞ്ജുള പരിക്കുകൾ മൂലം മരിച്ചു.
മറ്റ് പരിക്കേറ്റവർ ആശുപത്രിയിൽ ചികിത്സയിൽ തുടരുകയാണെന്നും, പൊട്ടിത്തെറിയുടെ കാരണം സംബന്ധിച്ച കൂടുതൽ വിവരങ്ങൾ അന്വേഷണം പുരോഗമിക്കുന്നതോടെ പുറത്തുവരുമെന്നും അധികൃതർ അറിയിച്ചു.
