നെടുമങ്ങാട് ∙ മുൻ ഗതാഗത മന്ത്രിയും എംഎൽഎയുമായ ആൻറണി രാജു തൊണ്ടിമുതൽ കൃത്രിമം കാണിച്ച കേസിൽ കുറ്റക്കാരനാണെന്ന് കോടതി കണ്ടെത്തി. 2026 ജനുവരി മൂന്നിന് നെടുമങ്ങാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയാണ് വിധി പ്രസ്താവിച്ചത്. കേസിലെ ശിക്ഷാവിധി പിന്നീട് പ്രഖ്യാപിക്കുമെന്ന് കോടതി അറിയിച്ചു.
1990ൽ ലഹരി മരുന്നുമായി പിടിയിലായ ഒരു ഓസ്ട്രേലിയൻ പൗരനെ രക്ഷപ്പെടുത്തുന്നതിനായി തൊണ്ടിമുതലായി പിടിച്ചെടുത്ത അടിവസ്ത്രത്തിൽ കൃത്രിമം കാണിച്ചുവെന്നാണ് കേസ്. ഈ സംഭവത്തിൽ ആൻറണി രാജു കുറ്റക്കാരനാണെന്ന് കോടതി കണ്ടെത്തുകയായിരുന്നു.
നേരത്തെ ഹൈക്കോടതി കേസ് റദ്ദാക്കിയിരുന്നെങ്കിലും, 2024 നവംബറിൽ സുപ്രീംകോടതി ആ ഉത്തരവ് റദ്ദാക്കി ക്രിമിനൽ നടപടികൾ പുനസ്ഥാപിച്ചു. കൂടാതെ, വിചാരണ നടപടികൾ ഒരു വർഷത്തിനകം പൂർത്തിയാക്കണമെന്ന് സുപ്രീംകോടതി നിർദേശിച്ചിരുന്നു. ഇതിന്റെ അടിസ്ഥാനത്തിലാണ് വിചാരണ പൂർത്തിയാക്കി ഇപ്പോൾ വിധി പ്രസ്താവിച്ചത്.
തെളിവ് നശിപ്പിക്കൽ, വ്യാജ തെളിവ് ചമയ്ക്കൽ, വിശ്വാസവഞ്ചന, ക്രിമിനൽ ഗൂഢാലോചന എന്നിവയാണ് ആൻറണി രാജുവിനെതിരെ ചുമത്തിയിരിക്കുന്ന പ്രധാന കുറ്റങ്ങൾ. കേസിലെ തുടർനടപടികളിലേക്കാണ് ഇനി കോടതി നീങ്ങുക.
