ഡാവോസ്: ലോക എക്കണോമിക് ഫോറം (WEF) സമ്മേളനത്തിൽ ഡാവോസിൽ നടത്തിയ പ്രത്യേക പ്രസംഗത്തിനിടെ, യൂറോപ്പിന്റെ കുടിയേറ്റ നയങ്ങളെയും മറ്റ് നയ സമീപനങ്ങൾക്കും എതിരെ അമേരിക്കൻ പ്രസിഡന്റ് ഡോണൾഡ് ട്രംപ് രൂക്ഷ വിമർശനം ഉന്നയിച്ചു. നിലവിലെ നയങ്ങൾ കാരണം യൂറോപ്പ് “സ്വയം നശിപ്പിക്കുകയാണ്” എന്നായിരുന്നു അദ്ദേഹത്തിന്റെ പരാമർശം.
കഴിഞ്ഞ ഒരു ദശകത്തിനിടെ യൂറോപ്യൻ രാജ്യങ്ങൾ സ്വീകരിച്ച നിയന്ത്രണമില്ലാത്ത കൂട്ട കുടിയേറ്റവും നയ തീരുമാനങ്ങളും കടുത്ത വിമർശനത്തിന് വിധേയമാക്കിയ ട്രംപ്, യൂറോപ്പിലെ ചില പ്രദേശങ്ങൾ ഇനി “യൂറോപ്പ് ആണെന്ന് തിരിച്ചറിയാൻ കഴിയാത്ത വിധം” മാറിയതായി പറഞ്ഞു. നിലവിലെ നയങ്ങൾ സാമൂഹിക ഐക്യത്തെയും സാമ്പത്തിക സ്ഥിരതയെയും സാംസ്കാരിക തിരിച്ചറിവിനെയും ദോഷകരമായി ബാധിക്കുന്നുവെന്നുമാണ് അദ്ദേഹത്തിന്റെ മുന്നറിയിപ്പ്.
“അവർ സ്വയം ചെയ്യുന്നത് അത്യന്തം ഭീകരമാണ്. അവർ തന്നെ സ്വയം നശിപ്പിക്കുകയാണ്,” എന്ന് ട്രംപ് പറഞ്ഞു. കുടിയേറ്റം, ഊർജം, സാമ്പത്തിക നയങ്ങൾ എന്നിവയിൽ വഴിത്തിരിവ് അനിവാര്യമാണെന്ന് അദ്ദേഹം യൂറോപ്യൻ നേതാക്കളോട് ആവശ്യപ്പെട്ടു.
യൂറോപ്പിന്റെ നിലവിലെ അവസ്ഥയെ അമേരിക്കയുടെ സാമ്പത്തിക പുനരുജ്ജീവനവുമായി താരതമ്യം ചെയ്ത ട്രംപ്, കർശനമായ അതിർത്തി നിയന്ത്രണങ്ങൾ, ആഭ്യന്തര ഊർജ ഉത്പാദനം, വളർച്ചാനുകൂല നയങ്ങൾ എന്നിവയാണ് അമേരിക്കയുടെ മുന്നേറ്റത്തിന് കാരണമെന്ന് അവകാശപ്പെട്ടു. ശക്തിയും മത്സരക്ഷമതയും നിലനിർത്താൻ നിയന്ത്രിത കുടിയേറ്റത്തിനും സാമ്പത്തിക വളർച്ചയ്ക്കും സുരക്ഷയ്ക്കും പാശ്ചാത്യ രാജ്യങ്ങൾ മുൻഗണന നൽകേണ്ടതുണ്ടെന്നും അദ്ദേഹം പറഞ്ഞു.
