ബരാമതി |ഇന്ന് രാവിലെ ബരാമതിയിൽ മഹാരാഷ്ട്ര ഉപമുഖ്യമന്ത്രി അജിത് പവാർ ഉൾപ്പെടെ ആറുപേർ വിമാനാപകടത്തിൽ മരിച്ചു. രാവിലെ മുംബൈയിൽ നിന്ന് ബരാമതിയിലേക്ക് പുറപ്പെട്ട സ്വകാര്യ ചാർട്ടേഡ് വിമാനം ബരാമതി വിമാനത്താവളത്തിൽ അടിയന്തര ലാൻഡിംഗ് നടത്തുന്നതിനിടെയാണ് അപകടത്തിൽപ്പെട്ടത്.

അപകടത്തിൽ രാഷ്ട്രീയ നേതാവിനൊപ്പം വിമാനത്തിലുണ്ടായിരുന്ന മറ്റ് അഞ്ചുപേരും മരിച്ചു. ഇതിൽ രണ്ട് വിമാന ജീവനക്കാരും രണ്ട് വ്യക്തിഗത സ്റ്റാഫ് അംഗങ്ങളും ഒരു അസിസ്റ്റന്റും ഉൾപ്പെടുന്നതായി അധികൃതർ അറിയിച്ചു.

ഡൽഹി ആസ്ഥാനമായുള്ള വി.എസ്.ആർ എന്ന ചാർട്ടർ കമ്പനിയുടെ ഉടമസ്ഥതയിലുള്ള ലിയർ ജെറ്റ് 45 എന്ന വിമാനമാണ് അപകടത്തിൽപ്പെട്ടത്. ലാൻഡിംഗിന് തൊട്ടുമുമ്പ് വിമാനത്തിന് സാങ്കേതിക തകരാറും നിയന്ത്രണം നഷ്ടപ്പെടുന്നതും ഉണ്ടായതായാണ് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) പ്രാഥമിക റിപ്പോർട്ടിൽ പറയുന്നത്.

അപകടത്തെ തുടർന്ന് ബരാമതി വിമാനത്താവളത്തിൽ രക്ഷാപ്രവർത്തനം ഉടൻ ആരംഭിച്ചു. തീപിടിത്തം നിയന്ത്രണവിധേയമാക്കിയ ശേഷം മൃതദേഹങ്ങൾ പുറത്തെടുത്ത് ആശുപത്രിയിലേക്ക് മാറ്റി. അപകടത്തിന്റെ യഥാർത്ഥ കാരണം കണ്ടെത്തുന്നതിനായി ഡിജിസിഎ വിശദമായ അന്വേഷണം ആരംഭിച്ചിട്ടുണ്ട്.