മംഗളൂരു: മംഗളൂരു–ചെന്നൈ റൂട്ടിൽ സർവീസ് നടത്തുന്ന വെസ്റ്റ് കോസ്റ്റ് സൂപ്പർഫാസ്റ്റ് എക്സ്പ്രസ് (ട്രെയിൻ നമ്പർ 22638) ശനിയാഴ്ച മുതൽ ലിങ്കെ ഹോഫ്മാൻ ബുഷ് (എൽഎച്ച് ബി) കോച്ചുകളോടെ സർവീസ് ആരംഭിച്ചു. പഴയ ഐസിഎഫ് റേക്കുകൾ മാറ്റി പുതുതായി എൽഎച്ച്ബി കോച്ചുകൾ ഉൾപ്പെടുത്തിയതോടെ യാത്രക്കാരുടെ സുരക്ഷയും സൗകര്യവും കൂടുതൽ മെച്ചപ്പെടും.
ഐസിഎഫ് കോച്ചുകളെ അപേക്ഷിച്ച് കോച്ചുകൾക്ക് മികച്ച അപകട പ്രതിരോധ ശേഷിയും സുഖകരമായ യാത്രാനുഭവവും കുറഞ്ഞ ശബ്ദവും മെച്ചപ്പെട്ട ബ്രേക്കിംഗ് സംവിധാനവും ഉണ്ട്. റിസർച്ച് ഡിസൈൻസ് ആൻഡ് സ്റ്റാൻഡേഡ്സ് ഓർഗനൈസേഷൻ (RDSO) നടത്തിയ പഠനങ്ങൾ പ്രകാരം, എൽഎച്ച് ബി കോച്ചുകൾ ഉപയോഗിക്കുന്നത് അപകടങ്ങളിൽ മരണസംഖ്യ 40 ശതമാനം വരെ കുറയ്ക്കാൻ സഹായിക്കും.
2000-ൽ ഇന്ത്യൻ റെയിൽവേയിൽ അവതരിപ്പിച്ച എൽഎച്ച് ബി കോച്ചുകൾ, 2018 മുതൽ പുതിയ കോച്ച് നിർമ്മാണങ്ങൾക്ക് നിർബന്ധമാക്കിയിട്ടുണ്ട്. വെസ്റ്റ് കോസ്റ്റ് സൂപ്പർഫാസ്റ്റ് എക്സ്പ്രസിലെ ഈ അപ്ഗ്രേഡ് ഇന്ത്യൻ റെയിൽവേയുടെ വ്യാപകമായ ഫ്ലീറ്റ് നവീകരണ പദ്ധതിയുടെ ഭാഗമാണ്.
പഴയ റോളിംഗ് സ്റ്റോക്ക് ഘട്ടംഘട്ടമായി ഒഴിവാക്കി കൂടുതൽ സുരക്ഷിതവും ആധുനികവുമായ കോച്ചുകൾ സർവീസിൽ കൊണ്ടുവരാനുള്ള ഇന്ത്യൻ റെയിൽവേയുടെ പ്രതിബദ്ധതയാണ് ഇതിലൂടെ വീണ്ടും വ്യക്തമാകുന്നതെന്ന് റെയിൽവേ അധികൃതർ അറിയിച്ചു.
