തിരുവനന്തപുരം: കഴിഞ്ഞ നിയമസഭാ തിരഞ്ഞെടുപ്പിൽ മത്സരിച്ച 10 സീറ്റുകളും കേരള കോൺഗ്രസ് (ജോസഫ്) ഗ്രൂപ്പിന് അർഹതപ്പെട്ടതാണെന്നും ആ സീറ്റുകൾ ആർക്കും വിട്ടുകൊടുക്കില്ലെന്നും പാർട്ടി നേതാവ് പി ജെ ജോസഫ് വ്യക്തമാക്കി. സീറ്റ് വിഭജനവുമായി ബന്ധപ്പെട്ട് നടക്കുന്ന പ്രചാരണങ്ങൾ അടിസ്ഥാനരഹിതമാണെന്നും അദ്ദേഹം പറഞ്ഞു.

ഇടുക്കി സീറ്റിൽ കോൺഗ്രസ് ഇതുവരെ അവകാശവാദം ഉന്നയിച്ചിട്ടില്ലെന്നും വിജയസാധ്യതയാണ് ഏറ്റവും പ്രധാനം എന്ന നിലപാടിലാണ് പാർട്ടിയെന്നും പി ജെ ജോസഫ് വ്യക്തമാക്കി. അതിനാൽ മികച്ച സ്ഥാനാർത്ഥികളെ തന്നെ മത്സരിപ്പിക്കുമെന്നും അദ്ദേഹം പറഞ്ഞു.

ആവശ്യമെങ്കിൽ സീറ്റുകൾ തമ്മിൽ വച്ച് മാറ്റം ഉണ്ടാകാമെങ്കിലും സീറ്റുകളുടെ എണ്ണം കുറയ്ക്കില്ലെന്നും അദ്ദേഹം കൂട്ടിച്ചേർത്തു.
യുഡിഎഫ് സഖ്യം ഒറ്റക്കെട്ടായി മുന്നോട്ടുപോകുമെന്നും സീറ്റ് വിഭജനവുമായി ബന്ധപ്പെട്ട തെറ്റായ വാർത്തകൾ തള്ളിക്കളയണമെന്നും പി ജെ ജോസഫ് ആവശ്യപ്പെട്ടു. യഥാർത്ഥ കേരള കോൺഗ്രസ് തങ്ങളുടെ പാർട്ടിയാണെന്നും അതിന് ബ്രാക്കറ്റ് ഇല്ലെന്നും പറഞ്ഞ് ജോസ് കെ മാണിയുടെ നേതൃത്വത്തിലുള്ള കേരള കോൺഗ്രസ് (എം)യെ അദ്ദേഹം പരിഹസിച്ചു.

അതേസമയം, പി ജെ ജോസഫ് ഇത്തവണയും തൊടുപുഴയിൽ നിന്ന് തന്നെ മത്സരിക്കുമെന്ന സൂചനയും പുറത്തുവന്നു. കൂടാതെ, അദ്ദേഹത്തിന്റെ മകൻ അപു ജോസഫിനെ ഇടുക്കി സീറ്റിൽ മത്സരിപ്പിക്കുന്ന കാര്യം പാർട്ടി ആലോചിക്കുന്നുണ്ടെന്നും റിപ്പോർട്ടുകളുണ്ട്.