ന്യൂഡൽഹി: യാത്രക്കാരുടെ സുരക്ഷ ഉറപ്പാക്കുന്നതിനോടൊപ്പം ആധുനികവത്കരണത്തിന് കൂടുതൽ പ്രാധാന്യം നൽകുന്ന നടപടികളുടെ ഭാഗമായി ഇന്ത്യൻ റെയിൽവേ കഴിഞ്ഞ ഒരു ദശാബ്ദത്തിനിടെ സുരക്ഷാ സംബന്ധമായ ചെലവ് മൂന്ന് മടങ്ങിലധികമായി വർധിപ്പിച്ചു. 2013-14 സാമ്പത്തിക വർഷത്തിലെ ₹39,200 കോടിയിൽ നിന്നു 2025-26ൽ ₹1,17,693 കോടിയായി സുരക്ഷാ ചെലവ് ഉയർന്നിട്ടുണ്ട്.
രാജ്യമൊട്ടാകെയുള്ള സുരക്ഷാ മെച്ചപ്പെടുത്തൽ പദ്ധതിയുടെ ഭാഗമായി, സ്വദേശീയമായി വികസിപ്പിച്ച ‘കവച്’ ഓട്ടോമാറ്റിക് ട്രെയിൻ പ്രൊട്ടക്ഷൻ (ATP) സംവിധാനം 23,360 റൂട്ട്കിലോമീറ്റർ ദൂരത്തിൽ നടപ്പിലാക്കിയിട്ടുണ്ട്. ഗോൾഡൻ ക്വാഡ്രിലാറ്ററൽ, ഗോൾഡൻ ഡയഗണൽ, ഹൈ ഡെൻസിറ്റി നെറ്റ്വർക്ക് ഉൾപ്പെടെ പ്രധാനപ്പെട്ട റെയിൽവേ പാതകളിൽ ഈ സംവിധാനം വ്യാപിപ്പിച്ചിരിക്കുകയാണ്.
ഉയർന്ന നിലവാരത്തിലുള്ള സേഫ്റ്റി ഇൻ്റഗ്രിറ്റി ലെവൽ (SIL-4) സർട്ടിഫിക്കേഷൻ നേടിയ കവച് സംവിധാനം, നിശ്ചിത വേഗപരിധിക്കുള്ളിൽ ട്രെയിൻ ഓടിക്കാൻ ലോക്കോ പൈലറ്റിനെ സഹായിക്കുന്നു. ലോക്കോ പൈലറ്റ് ആവശ്യമായ സമയത്ത് ബ്രേക്ക് പ്രയോഗിക്കാൻ പരാജയപ്പെട്ടാൽ, ട്രെയിൻ സ്വയം ബ്രേക്ക് പ്രയോഗിക്കുന്നതിനാൽ അപകടസാധ്യത ഗണ്യമായി കുറയുന്നു. മൂടൽമഞ്ഞ് പോലുള്ള പ്രതികൂല കാലാവസ്ഥാ സാഹചര്യങ്ങളിലും ട്രെയിനുകൾ സുരക്ഷിതമായി ഓടിക്കാൻ ഇത് സഹായിക്കുന്നു.
കവച് സംവിധാനത്തിന്റെ നടപ്പാക്കലിന്റെ ഭാഗമായി സ്വീകരിച്ച പ്രധാന നടപടികൾ:
ഓരോ സ്റ്റേഷനിലും ബ്ലോക്ക് സെക്ഷനുകളിലും സ്റ്റേഷൻ കവച് സ്ഥാപിക്കൽ
പാതകളുടെ മുഴുവൻ ദൂരത്തിലും ആർഎഫ് ഐഡി(RFID) ടാഗുകൾ സ്ഥാപിക്കൽ
ബന്ധപ്പെട്ട ഭാഗങ്ങളിൽ ടെലികോം ടവറുകൾ സ്ഥാപിക്കൽ
ട്രാക്കിനൊപ്പമായി ഓപ്റ്റിക്കൽ ഫൈബർ കേബിൾ (OFC) സ്ഥാപിക്കൽ
ഇന്ത്യൻ റെയിൽവേയിൽ ഓടുന്ന എല്ലാ ലോക്കോമോട്ടീവുകളിലും ലോക്കോ കവച് സംവിധാനമൊരുക്കൽ
യാത്രക്കാരുടെ സുരക്ഷയും നിരീക്ഷണവും കൂടുതൽ ശക്തിപ്പെടുത്തുന്നതിനായി രാജ്യത്തെ റെയിൽവേ ശൃംഖലയിലുടനീളം 12,300 കോച്ചുകളിലും 460 ലോക്കോമോട്ടീവുകളിലും സിസിടിവി ക്യാമറകൾ സ്ഥാപിച്ചിട്ടുണ്ട്.
മുന്നേറ്റ സാങ്കേതിക വിദ്യകൾ റെയിൽവേ പ്രവർത്തനങ്ങളിൽ ഏകീകരിച്ച്, കോടിക്കണക്കിന് യാത്രക്കാർക്ക് കൂടുതൽ സുരക്ഷിതവും കാര്യക്ഷമവുമായ യാത്ര ഉറപ്പാക്കുകയാണ് ഈ നടപടികളിലൂടെ ലക്ഷ്യമിടുന്നതെന്ന് അധികൃതർ അറിയിച്ചു.
