വാഷിങ്ടൺ ഡി.സി:അമേരിക്ക ഹോർമൂസ് കടലിടുക്ക് “തുറന്നതും സുരക്ഷിതവും സ്വതന്ത്രവു”മാണെന്ന് – “ഒരു തരത്തിലല്ലെങ്കിൽ മറ്റൊരു തരത്തിൽ” – അമേരിക്ക ഉറപ്പാക്കുമെന്ന് പ്രസിഡന്റ് ഡൊണാൾഡ് ജെ. ട്രംപ് പ്രഖ്യാപിച്ചു. പ്രഖ്യാപിച്ചു. ഇറാനുമായുള്ള സംഘർഷം തുടരുന്നതിനിടെ ആഗോള എണ്ണ ഗതാഗതം തടസ്സപ്പെടുന്ന സാഹചര്യത്തിലാണ് ട്രംപിന്റെ മുന്നറിയിപ്പ്.

വൈറ്റ്ഹൗസിന്റെ ഔദ്യോഗിക എക്‌സ് (മുൻപ് ട്വിറ്റർ) അക്കൗണ്ടിലൂടെ പങ്കുവെച്ച പോസ്റ്റിൽ, അമേരിക്കൻ സൈന്യം ഇതിനകം തന്നെ “ഇറാന്റെ സൈനിക ശേഷിയുടെ 100 ശതമാനവും നശിപ്പിച്ചു” എന്ന് ട്രംപ് അവകാശപ്പെട്ടു. ഡ്രോണുകൾ, മൈനുകൾ, ചെറുദൂര മിസൈലുകൾ തുടങ്ങിയ ഭീഷണികളിലൂടെ ഹോർമൂസ് കടലിടുക്ക് അടയ്ക്കാൻ ഇറാൻ ശ്രമിക്കുന്നുവെന്നും അദ്ദേഹം ആരോപിച്ചു.

ലോകത്തിലെ എണ്ണയും ദ്രവീകൃത പ്രകൃതി വാതകവും ഉൾപ്പെടെയുള്ള ചരക്കുകളുടെ ഏകദേശം 20 ശതമാനം കടന്നുപോകുന്ന ഈ കടലിടുക്ക് സുരക്ഷിതമാക്കാൻ ചൈന, ഫ്രാൻസ്, ജപ്പാൻ, ദക്ഷിണ കൊറിയ, യുണൈറ്റഡ് കിംഗ്ഡം ഉൾപ്പെടെയുള്ള രാജ്യങ്ങൾ അമേരിക്കയോടൊപ്പം യുദ്ധക്കപ്പലുകൾ വിന്യസിക്കണമെന്ന് ട്രംപ് ആഹ്വാനം ചെയ്തു.

കടലിടുക്കിൽ ഇടപെടാൻ ശ്രമിക്കുന്ന ഇറാനിയൻ ബോട്ടുകളും കപ്പലുകളും നശിപ്പിക്കുമെന്നും, ആവശ്യമെങ്കിൽ തീരപ്രദേശങ്ങൾക്കെതിരെ ശക്തമായ ബോംബാക്രമണം തുടരുമെന്നും ട്രംപ് മുന്നറിയിപ്പ് നൽകി. കഴിഞ്ഞ ദിവസങ്ങളിൽ അമേരിക്ക നടത്തിയ ആക്രമണങ്ങളിൽ മൈനുകൾ സ്ഥാപിക്കാൻ ഉപയോഗിച്ചിരുന്ന നിരവധി ഇറാനിയൻ കപ്പലുകൾ തകർത്തതായും, ഇറാന്റെ പ്രധാന എണ്ണ കയറ്റുമതി കേന്ദ്രമായ ഖാർഗ് ദ്വീപിലെ സൈനിക അടിസ്ഥാനങ്ങളും ലക്ഷ്യമിട്ടതായും റിപ്പോർട്ടുകളുണ്ട്.

2026 ഫെബ്രുവരി അവസാനത്തോടെ, അമേരിക്കയും ഇസ്രായേലും നടത്തിയ സൈനിക നടപടികൾക്ക് മറുപടിയായി ഇറാൻ ഹോർമൂസ് കടലിടുക്ക് “അടച്ചതായി” പ്രഖ്യാപിച്ചതോടെ സ്ഥിതി ഗുരുതരമായി. കഴിഞ്ഞ ദിവസങ്ങളിൽ കുറച്ച് മൈനുകൾ കടലിൽ സ്ഥാപിച്ചതായും റിപ്പോർട്ടുകളുണ്ട്. എന്നാൽ അവ നീക്കം ചെയ്യാൻ അമേരിക്കൻ സെൻട്രൽ കമാൻഡ് ആക്രമണങ്ങൾ നടത്തിയതായി വിവരമുണ്ട്.ഇതിനെ തുടർന്ന് കടൽഗതാഗതം കുറയുകയും ആഗോള വിപണിയിൽ എണ്ണ വില ഉയരുകയും ചെയ്തു

ട്രംപ് പറഞ്ഞ രാജ്യങ്ങളിൽ നിന്നൊന്നും ഇതുവരെ യുദ്ധക്കപ്പലുകൾ അയയ്ക്കുന്നതിനെക്കുറിച്ച് ഔദ്യോഗിക സ്ഥിരീകരണം ലഭിച്ചിട്ടില്ല. അമേരിക്ക ഇതിനകം തന്നെ വാണിജ്യ എണ്ണക്കപ്പലുകൾക്ക് നാവിക സുരക്ഷ നൽകുന്നതും സർക്കാർ പിന്തുണയുള്ള ഇൻഷുറൻസ് നൽകുന്നതും പരിഗണിച്ചിട്ടുണ്ടെങ്കിലും സുരക്ഷാ ഭീഷണികൾ തുടരുന്നതിനാൽ വ്യാപാര കപ്പൽ കമ്പനികൾ ഇപ്പോഴും ജാഗ്രത പാലിക്കുകയാണ്.

സംഘർഷം മൂന്നാം ആഴ്ചയിലേക്ക് കടക്കുമ്പോൾ, ഹോർമൂസ് കടലിടുക്ക് വീണ്ടും തുറക്കുന്നത് ആഗോള ഊർജ സ്ഥിരതയ്ക്ക് അനിവാര്യമാണെന്നും ഇറാന്റെ നടപടികൾക്കെതിരെ അന്താരാഷ്ട്ര സമൂഹത്തിന്റെ ഐക്യം തെളിയിക്കുന്ന പരീക്ഷണവുമാണെന്നും ട്രംപ് പറഞ്ഞു.