കാസർകോട്: അമിതമായ ജോലി സമ്മർദ്ദം സഹിക്കാനാകാതെ യുവാവ് പുഴയിൽ ചാടി ജീവനൊടുക്കിയതായി ദാരുണ സംഭവം. മൊഗ്രാൽ പുത്തൂർ സ്വദേശിയായ സവാദ് (32) ആണ് മരിച്ചത്. ശനിയാഴ്ച രാവിലെ മൊഗ്രാൽ പാലത്തിൽ നിന്ന് പുഴയിലേക്ക് ചാടിയ സവാദിനെ നാട്ടുകാർ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ചെർക്കള ഗവൺമെന്റ് ഹയർ സെക്കൻഡറി സ്കൂളിലെ അറബിക് അധ്യാപകനായിരുന്ന സവാദ്, അധ്യാപനത്തിനൊപ്പം ബൂത്ത് ലെവൽ ഓഫീസർ (ബി.എൽ.ഒ) ചുമതലയും വഹിച്ചിരുന്നു. ഈ ഇരട്ട ചുമതലകളുടെ ഭാഗമായി കടുത്ത മാനസിക സമ്മർദ്ദത്തിലായിരുന്നുവെന്ന് ബന്ധുക്കൾ ആരോപിക്കുന്നു.

സവാദിന് വ്യക്തിപരമായ പ്രശ്നങ്ങളൊന്നുമില്ലായിരുന്നുവെന്നും, ഔദ്യോഗികമായ ജോലി ഭാരം തന്നെയാണ് ഈ ദാരുണ തീരുമാനത്തിലേക്ക് നയിച്ചതെന്നും സുഹൃത്തുക്കളും ബന്ധുക്കളും പറയുന്നു. ഇതിനുസംബന്ധിച്ച് സവാദ് മുമ്പ് സുഹൃത്തുക്കളോട് തന്റെ വിഷമം പങ്കുവച്ചിരുന്നുവെന്നും അവർ കൂട്ടിച്ചേർത്തു.

സംഭവത്തിൽ ജില്ലാ കളക്ടർ നേരിട്ട് എത്തി വിശദീകരണം നൽകണമെന്ന് ആവശ്യപ്പെട്ട് ബന്ധുക്കൾ രംഗത്തെത്തി.