ടെഹ്റാൻ: ആഗോള ഊർജ്ജ ഗതാഗതത്തിന് നിർണായകമായ ഹോർമോസ് കടലിടുക്ക് എല്ലാ കപ്പലുകൾക്കും തുറന്നിരിക്കുകയാണെങ്കിലും “ഇറാന്റെ ശത്രുക്കളുമായി ബന്ധമുള്ള” കപ്പലുകൾക്ക് പ്രവേശനമുണ്ടാകില്ലെന്ന് ഇറാൻ വ്യക്തമാക്കിയതായി ഞായറാഴ്ച പുറത്തുവന്ന റിപ്പോർട്ടുകൾ പറയുന്നു.
യുഎസ്, ഇസ്രയേൽ എന്നിവയുമായി തുടരുന്ന സംഘർഷ സാഹചര്യത്തിലാണ് ഈ മുന്നറിയിപ്പ്. ലോകത്തെ എണ്ണയും എൽ.എൻ.ജി വിതരണവും ഏകദേശം അഞ്ചിൽ ഒന്നോളം ഈ കടലിടുക്കിലൂടെ പോകുന്നതാണ്, അതിനാൽ ഇവിടെ ഉണ്ടായ അനിശ്ചിതത്വം ആഗോള ഊർജ്ജ വിപണിയിൽ ആശങ്ക ഉയർത്തിയിട്ടുണ്ട്.
ഇറാന്റെ പ്രതിനിധിയായ അലി മൗസവി, ഇൻറർനാഷണൽ മറിടൈം ഓർഗനൈസേഷനുമായി സഹകരിച്ച് കടൽസുരക്ഷ ശക്തിപ്പെടുത്താനും നാവികരെ സംരക്ഷിക്കാനുമുള്ള നടപടി സ്വീകരിക്കുമെന്ന് അറിയിച്ചു. ഇറാന്റെ “വൈരികളുമായി” ബന്ധമില്ലാത്ത കപ്പലുകൾക്ക് സുരക്ഷാ ക്രമീകരണങ്ങൾ ഏകോപിപ്പിച്ച് കടലിടുക്ക് കടക്കാമെന്നും അദ്ദേഹം കൂട്ടിച്ചേർത്തു.
“ നയതന്ത്രമാണ് ഇറാന്റെ മുൻഗണന. എന്നാൽ ആക്രമണങ്ങൾ പൂർണ്ണമായും അവസാനിക്കണമെന്നും പരസ്പര വിശ്വാസവും ആവശ്യമാണ്,” മൗസവി പറഞ്ഞു. ഹോർമുസ് കടലിടുക്കിലെ നിലവിലെ പ്രതിസന്ധിക്ക് ഇസ്രയേലിന്റെയും അമേരിക്കയുടെയും ഇറാനെതിരായ ആക്രമണങ്ങളാണ് കാരണം എന്നും അദ്ദേഹം ആരോപിച്ചു.
മേഖലയിലെ അനിശ്ചിതത്വം തുടരുന്നതിനാൽ കടൽഗതാഗതം ബാധിക്കപ്പെട്ടിരിക്കുകയാണ്. ഇത് ആഗോള ഇന്ധന വിതരണത്തിൽ വലിയ പ്രതിസന്ധിക്ക് വഴിവെക്കുമെന്ന ആശങ്ക ഉയരുന്നുണ്ട്.
