ചെറുതോണി: ഇടുക്കി ജില്ലയിലെ ചെറുതോണിയിൽ വനപ്രദേശത്ത് കയറി മധ്യവയസ്കൻ ജീവനൊടുക്കിയ സംഭവം ദുഃഖമുണർത്തി. മുരിക്കാശ്ശേരി ചെമ്പകപ്പാറ കണ്ണാത്തുകുഴി സ്വദേശി ഷിജോ ജോർജ് (52) ആണ് മരിച്ചത്. തിങ്കളാഴ്ച രാവിലെ പാമ്പള ഡാമിന് സമീപമുള്ള വനപ്രദേശത്തായിരുന്നു സംഭവം.

രാവിലെ വീട്ടിൽ നിന്ന് കാറുമായി പുറപ്പെട്ട ഷിജോ, പാമ്പള ഡാമിന് സമീപം എത്തിയപ്പോൾ പാതയോരത്ത് വാഹനം നിർത്തി വനത്തിനുള്ളിലേക്ക് പ്രവേശിക്കുകയായിരുന്നു. മരണത്തിന് തൊട്ടുമുമ്പ് സുഹൃത്തുക്കളെ ഫോണിൽ ബന്ധപ്പെട്ടു താൻ ജീവിതം അവസാനിപ്പിക്കാൻ പോകുകയാണെന്ന് അറിയിച്ചതായി റിപ്പോർട്ടുകൾ പറയുന്നു.
ഇത് കേട്ട് പരിഭ്രാന്തരായ സുഹൃത്തുക്കൾ ഉടൻ സ്ഥലത്തെത്തി തിരച്ചിൽ നടത്തിയെങ്കിലും, പിന്നീട് ഷിജോയെ മരിച്ച നിലയിൽ കണ്ടെത്തുകയായിരുന്നു.

വിവരമറിഞ്ഞ് കരിമണൽ പൊലീസ് സ്ഥലത്തെത്തി മേൽനടപടികൾ സ്വീകരിച്ചു.
ശരീരം ഇടുക്കി മെഡിക്കൽ കോളേജിലേക്ക് മാറ്റി പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷം ബന്ധുക്കൾക്ക് വിട്ടുനൽകി. ഷിജോ കുറച്ചുകാലമായി വിഷാദരോഗത്തിന് ചികിത്സയിലായിരുന്നുവെന്ന് പൊലീസ് അറിയിച്ചു.
ഭാര്യ: സിനി. മക്കൾ: നവീൻ, നയന റോസ്.