2026-ലെ കേരള നിയമസഭാ തെരഞ്ഞെടുപ്പിന് മുന്നോടിയായി സംസ്ഥാനത്തെ പ്രധാന രാഷ്ട്രീയ മുന്നണികളായ ഇടതുപക്ഷ ജനാധിപത്യ മുന്നണി, ഐക്യ ജനാധിപത്യ മുന്നണി, എൻ.ഡി.എ എന്നിവ തങ്ങളുടെ പ്രകടനപത്രികകൾ പുറത്തിറക്കി. തിരഞ്ഞെടുപ്പ് പ്രചാരണത്തിനിടയിൽ വോട്ടർമാരെ ആകർഷിക്കുന്ന ലക്ഷ്യത്തോടെ ക്ഷേമം, തൊഴിൽ, അടിസ്ഥാന സൗകര്യ വികസനം എന്നിവ മുൻനിർത്തിയ വാഗ്ദാനങ്ങളാണ് മുന്നണികൾ മുന്നോട്ട് വെച്ചിരിക്കുന്നത്.
ഇന്ന് (ഏപ്രിൽ 2, 2026) ഇടതുപക്ഷ ജനാധിപത്യ മുന്നണിയുടെ പ്രകടനപത്രിക കോഴിക്കോട് വെച്ച് മുഖ്യമന്ത്രി പിണറായി വിജയൻ പുറത്തിറക്കി. ക്ഷേമ പെൻഷൻ 3,000 രൂപയായി ഉയർത്തുമെന്നതാണ് പ്രധാന വാഗ്ദാനം. കൂടാതെ കേരളത്തെ ദാരിദ്ര്യമുക്ത സംസ്ഥാനമാക്കാനുള്ള പദ്ധതികളും പ്രഖ്യാപിച്ചിട്ടുണ്ട്. തൊഴിൽ രംഗത്ത് കാമ്പസ് പ്ലേസ്മെന്റുകൾ വർദ്ധിപ്പിക്കുകയും “ബാക്ക് ടു കാമ്പസ്” പദ്ധതി നടപ്പിലാക്കുകയും ചെയ്യുമെന്ന് വ്യക്തമാക്കിയിട്ടുണ്ട്. സ്ത്രീക്ഷേമത്തിനായി തൊഴിലിടങ്ങളിൽ സ്ത്രീകളുടെ പങ്കാളിത്തം 50 ശതമാനമായി ഉയർത്തുന്നതും ലക്ഷ്യമിടുന്നു.
അതേ ദിവസം തന്നെ ഐക്യ ജനാധിപത്യ മുന്നണിയുടെ പ്രകടനപത്രിക കൊച്ചിയിൽ പ്രതിപക്ഷ നേതാവ് വി.ഡി. സതീശൻ പ്രകാശനം ചെയ്തു. “ഇന്ദിരാ ഗ്യാരന്റികൾ” എന്ന പേരിൽ അഞ്ച് പ്രധാന വാഗ്ദാനങ്ങളാണ് മുന്നോട്ട് വെച്ചിരിക്കുന്നത്. സ്ത്രീകൾക്ക് കെ.എസ്.ആർ.ടി.സി ബസുകളിൽ സൗജന്യ യാത്ര, ക്ഷേമ പെൻഷൻ 3,000 രൂപയാക്കി ഉയർത്തൽ, മുൻ മുഖ്യമന്ത്രി ഉമ്മൻ ചാണ്ടിയുടെ പേരിൽ എല്ലാ കുടുംബങ്ങൾക്കും 25 ലക്ഷം രൂപയുടെ ആരോഗ്യ ഇൻഷുറൻസ് പരിരക്ഷ എന്നിവ പ്രധാന വാഗ്ദാനങ്ങളിലുണ്ട്. കൂടാതെ കോളേജ് വിദ്യാർത്ഥിനികൾക്ക് പ്രതിമാസം 1,000 രൂപ ധനസഹായവും യുവാക്കൾക്ക് ബിസിനസ് ആരംഭിക്കാൻ 5 ലക്ഷം രൂപ വരെ പലിശരഹിത വായ്പയും നൽകുമെന്ന് യു.ഡി.എഫ് പ്രഖ്യാപിച്ചു.
ഇതിനുമുമ്പ് മാർച്ച് 31-ന് തന്നെ എൻ.ഡി.എ തന്റെ പ്രകടനപത്രിക പുറത്തിറക്കിയിരുന്നു. “വികസിത കേരളം” എന്ന ലക്ഷ്യത്തോടെ തയ്യാറാക്കിയ പത്രികയിൽ സംസ്ഥാനത്തിന്റെ സാമ്പത്തിക വളർച്ചക്കും അടിസ്ഥാന സൗകര്യ വികസനത്തിനും മുൻഗണന നൽകുന്ന റോഡ്മാപ്പാണ് അവതരിപ്പിച്ചിരിക്കുന്നത്. സ്ത്രീകളുടെയും ദരിദ്ര കുടുംബങ്ങളുടെയും ക്ഷേമത്തിനായി പ്രത്യേക പദ്ധതികളും ഉൾപ്പെടുത്തിയതായി എൻ.ഡി.എ നേതൃത്വം അറിയിച്ചു.
തിരഞ്ഞെടുപ്പിന് മുന്നോടിയായി പുറത്തിറങ്ങിയ ഈ പ്രകടനപത്രികകൾ സംസ്ഥാന രാഷ്ട്രീയത്തിൽ ശക്തമായ ചർച്ചകൾക്ക് വഴിവെക്കുന്നതോടൊപ്പം വോട്ടർമാരുടെ തീരുമാനം സ്വാധീനിക്കുമെന്ന പ്രതീക്ഷയിലാണ് മുന്നണികൾ
