ദുബായ് — മേഖലയിൽ ഉയർന്നുവരുന്ന സുരക്ഷാ ആശങ്കകളെ തുടർന്ന് ദുബായിലെ നിരവധി പ്രധാന പള്ളികളിൽ നേരിട്ടുള്ള വിശുദ്ധ കുർബാനകളും മറ്റു പ്രവർത്തനങ്ങളും ഏപ്രിൽ 3 മുതൽ അനിശ്ചിതകാലത്തേക്ക് നിർത്തിവെച്ചു. പൊതുസുരക്ഷയും സമൂഹത്തിന്റെ ക്ഷേമവും ഉറപ്പാക്കുന്നതിനായി സർക്കാർ നിയന്ത്രണ ഏജൻസികളുമായി സഹകരിച്ചാണ് ഈ തീരുമാനം എടുത്തത്.

ക്രിസ്ത്യൻ വിശ്വാസികൾക്ക് ഏറെ പ്രാധാന്യമുള്ള വിശുദ്ധവാരാഘോഷങ്ങൾ നടക്കുന്നതിനിടെയാണ് ഈ തീരുമാനം വന്നിരിക്കുന്നത്. ഏപ്രിൽ 3-നുള്ള ദുഃഖവെള്ളിയും ഏപ്രിൽ 5-നുള്ള ഈസ്റ്റർ ഞായറാഴ്ചയും ഉൾപ്പെടെയുള്ള ശുശ്രൂഷകൾക്ക് ഇത് ബാധകമാണ്. പള്ളികളുടെ പരിസരം മുഴുവൻ സന്ദർശകർക്കായി അടച്ചിട്ടിരിക്കുകയാണ്. വിശ്വാസികൾ പള്ളികളിലേക്ക് നേരിട്ട് എത്തുന്നത് ഒഴിവാക്കണമെന്ന് അധികൃതർ നിർദ്ദേശിച്ചു.

ചില പള്ളികൾ ഓൺലൈൻ പ്ലാറ്റ്ഫോമുകൾ വഴി ശുശ്രൂഷകൾ നടത്താനുള്ള സംവിധാനം ഒരുക്കിയിട്ടുണ്ട്. സെന്റ് മേരീസ് കാത്തലിക് ചർച്ചിൽ,ഗുഡ് ഫ്രൈഡേ ശുശ്രൂഷകൾ ഉച്ചയ്ക്ക് 3:00നും വൈകുന്നേരം 6:00നും അവരുടെ യൂട്യൂബ് ചാനൽ വഴി സംപ്രേഷണം ചെയ്യും. അതേസമയം സെൻറ് ഫ്രാൻസിസ് കാത്തലിക് ചർച്ചിൽ,എല്ലാ ശുശ്രൂഷകളും പരിപാടികളും റദ്ദാക്കിയിട്ടുണ്ട്; ഓൺലൈൻ സംപ്രേഷണത്തെക്കുറിച്ച് ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല. മാർത്തോമാ പാരിഷ്, സെൻറ് തോമസ് ഓർത്തഡോക്സ് കത്തീഡ്രൽ എന്നിവയും വാരാന്ത്യവും ഗുഡ് ഫ്രൈഡേയും ഉൾപ്പെടെയുള്ള എല്ലാ ശുശ്രൂഷകളും ഓൺലൈൻ പ്ലാറ്റ്ഫോമുകളിലേക്ക് മാറ്റിയിട്ടുണ്ട്.

രാജ്യവ്യാപകമായി നടപ്പിലാക്കിയ സുരക്ഷാ മാർഗനിർദേശങ്ങളുടെ ഭാഗമായാണ് ഈ നടപടികൾ. 2026-ലെ ഈദുൽ ഫിത്തർ നമസ്കാരങ്ങളും പുറംപ്രദേശങ്ങളിൽ നടത്തുന്നത് നിർത്തിയിരുന്നു, പ്രാർത്ഥനകൾ മസ്ജിദുകളുടെ ഉൾവശങ്ങളിൽ മാത്രം പരിമിതപ്പെടുത്തുകയും ചെയ്തിട്ടുണ്ട്.

ഇതിനൊപ്പം സെൻറ് മീനാ കോപ്റ്റിക് ഓർത്തഡോക്സ് പള്ളിയും താൽക്കാലികമായി അടച്ചിടുന്നതായി സ്ഥിരീകരിച്ചിട്ടുണ്ട്. സ്ഥിതിഗതികൾ നിരീക്ഷിച്ചുകൊണ്ട് തുടർ നടപടികൾ പിന്നീട് അറിയിക്കുമെന്ന് അധികൃതർ അറിയിച്ചു.