ചെന്നൈ: ട്രാക്ഷൻ ഡിസ്ട്രിബ്യൂഷൻ (TRD) സംവിധാനത്തിലെ തകരാറുകൾ ഗണ്യമായി കുറച്ച് ശ്രദ്ധേയ നേട്ടം കൈവരിച്ചതായി ദക്ഷിണ റെയിൽവേ അറിയിച്ചു. 2024-25 സാമ്പത്തിക വർഷത്തിൽ 13 ആയിരുന്ന TRD ആസ്തി തകരാറുകൾ 2025-26ൽ വെറും 3 ആയി കുറഞ്ഞതായി റെയിൽവേ അധികൃതർ വ്യക്തമാക്കി. ഇതോടെ 77 ശതമാനത്തിന്റെ പുരോഗതി കൈവരിച്ച ദക്ഷിണ റെയിൽവേ, ഓവർഹെഡ് ഉപകരണങ്ങളുടെയും വൈദ്യുതി വിതരണ സംവിധാനങ്ങളുടെയും വിശ്വാസ്യതയിൽ ഇന്ത്യൻ റെയിൽവേയിലെ മികച്ച സോണുകളിൽ ഒന്നായി മാറിയിരിക്കുകയാണ്.

റെയിൽവേ ബ്ലോക്ക് മാനേജ്മെന്റ് സിസ്റ്റം (RBMS) നടപ്പാക്കിയതോടെയാണ് ഈ മുന്നേറ്റമെന്ന് അധികൃതർ വ്യക്തമാക്കി. ആസ്തികളുടെ ക്രമബദ്ധമായ നിരീക്ഷണം, സമയബന്ധിത പ്രതിരോധപരമായ അറ്റകുറ്റപ്പണി, വൈകിയ അറ്റകുറ്റ പണികൾ ഏകദേശം പൂർണമായും ഒഴിവാക്കൽ, കൂടാതെ ഉപകരണങ്ങളുടെ അവസ്ഥ മുൻകൂട്ടി വിലയിരുത്തി നടത്തുന്ന പ്രവചനാത്മക ഇടപെടലുകൾ എന്നിവയാണ് സംവിധാനത്തിന്റെ പ്രധാന സവിശേഷതകൾ.
ഇതിലൂടെ വൈദ്യുത ട്രെയിനുകളുടെ സമയനിഷ്ഠ മെച്ചപ്പെട്ടതായും, യാത്രാമധ്യേയുള്ള തടസ്സങ്ങളും സമയ നഷ്ടവും കുറഞ്ഞതായും ദക്ഷിണ റെയിൽവേ അറിയിച്ചു. പ്രവർത്തനസുരക്ഷ വർധിച്ചതിനൊപ്പം തിരക്കേറിയ റൂട്ടുകളിൽ യാത്രക്കാർക്ക് കൂടുതൽ സുഗമവും വിശ്വാസ്യതയുള്ളതുമായ യാത്രാനുഭവം ഉറപ്പാക്കാനായതായും അധികൃതർ കൂട്ടിച്ചേർത്തു.