കോട്ടയം: മുണ്ടക്കയം-കുട്ടിക്കാനം റോഡിൽ പെരുവന്താനത്തിന് സമീപം റോഡിലേക്ക് കൂറ്റൻ കല്ല് അടർന്നുവീണ് അപകടം. പുലർച്ചെ 4.30ഓടെയായിരുന്നു സംഭവം. മലമുകളിൽ നിന്നും ഇളകിവന്ന വലിയ കല്ല് അതുവഴി കടന്നുപോവുകയായിരുന്ന കെഎസ്ആർടിസി ബസിന്റെ പിന്നിൽ ഇടിക്കുകയായിരുന്നു.

അപകടത്തിൽ ബസിലുണ്ടായിരുന്ന ഒരു യാത്രക്കാരന് പരിക്കേറ്റു. പരിക്കേറ്റയാളെ സമീപത്തെ ആശുപത്രിയിലേക്ക് മാറ്റിയതായി അധികൃതർ അറിയിച്ചു. ബസിന്റെ പിൻഭാഗത്തിന് കേടുപാടുകൾ സംഭവിച്ചിട്ടുണ്ട്.

വലിയൊരു ദുരന്തമാണ് തലനാരിഴയ്ക്ക് ഒഴിവായതെന്ന് നാട്ടുകാർ പറഞ്ഞു. അതിരാവിലെ സമയമായതിനാൽ റോഡിൽ മറ്റ് വാഹനങ്ങളുടെ തിരക്ക് കുറവായിരുന്നു. അപകടസമയത്ത് ബസിന് പിന്നിലായി ഇരുചക്ര വാഹനങ്ങളോ ചെറിയ വാഹനങ്ങളോ ഇല്ലാതിരുന്നതും വൻ അപകടം ഒഴിവാക്കാൻ കാരണമായി.

കല്ല് ചെറിയ വാഹനങ്ങളുടെ മുകളിലേക്കാണ് വീണിരുന്നതെങ്കിൽ ജീവഹാനി ഉൾപ്പെടെയുള്ള ഗുരുതര അപകടങ്ങൾ സംഭവിക്കാമായിരുന്നുവെന്ന് പ്രദേശവാസികൾ പറഞ്ഞു. സംഭവത്തെ തുടർന്ന് പ്രദേശത്ത് ഗതാഗതം കുറച്ചുനേരം തടസപ്പെട്ടു. പിന്നീട് അധികൃതർ എത്തി കല്ല് മാറ്റി ഗതാഗതം പുനഃസ്ഥാപിച്ചു.