ന്യൂഡൽഹി: അമേരിക്കൻ സ്വാതന്ത്ര്യദിനാഘോഷ പരിപാടിക്കിടെ ഇന്ത്യയിലെ യു.എസ് അംബാസഡർ സെർജിയോ ഗോർ, അമേരിക്കൻ പ്രസിഡന്റ് ഡൊണാൾഡ് ട്രംപുമായുണ്ടായ ഫോൺ സംഭാഷണത്തിന്റെ വിവരങ്ങൾ പങ്കുവെച്ചു. പ്രധാനമന്ത്രി നരേന്ദ്ര മോദിയുടെ “വലിയ, വലിയ ആരാധകനാണ്” താനെന്ന് ട്രംപ് പറഞ്ഞതായി ഗോർ വെളിപ്പെടുത്തി. അമേരിക്കയും ഇന്ത്യയും തമ്മിലുള്ള ബന്ധം ഇതുവരെ കാണാത്ത വിധം ശക്തമാണെന്നും ട്രംപ് അഭിപ്രായപ്പെട്ടതായി അദ്ദേഹം അറിയിച്ചു.

ഡൽഹിയിൽ നടന്ന ചടങ്ങിൽ സംസാരിക്കവെയാണ് സെർജിയോ ഗോർ ഇക്കാര്യം പരാമർശിച്ചത്. ഇരു രാജ്യങ്ങളും തമ്മിലുള്ള തന്ത്രപ്രധാന പങ്കാളിത്തം കൂടുതൽ ശക്തിപ്പെടുത്താനുള്ള ശ്രമങ്ങൾ പുരോഗമിക്കുന്ന പശ്ചാത്തലത്തിലാണ് ഈ സന്ദേശം ശ്രദ്ധ നേടുന്നത്.

സമീപകാലത്ത് അമേരിക്കയും ഇന്ത്യയും തമ്മിൽ വ്യാപാര ചട്ടക്കൂട് കരാറുകളിലും വിവിധ മേഖലകളിലെ സഹകരണങ്ങളിലും പുരോഗതി കൈവരിച്ചിരുന്നു. കൂടാതെ ഇരുരാജ്യ നേതാക്കളും തമ്മിൽ നിരവധി ഫോൺ സംഭാഷണങ്ങളും ഉന്നതതല കൂടിക്കാഴ്ചകളും നടന്നിരുന്നു. യു.എസ് സ്റ്റേറ്റ് സെക്രട്ടറി മാർക്കോ റൂബിയോയുടെ ഇന്ത്യാ സന്ദർശനവും ഈ ബന്ധം ശക്തിപ്പെടുത്താനുള്ള നീക്കങ്ങളുടെ ഭാഗമായിരുന്നു. 2025-ലെ തീരുവ തർക്കങ്ങൾ ഉണ്ടായിരുന്നെങ്കിലും ഉഭയകക്ഷി ബന്ധം മുന്നോട്ട് കൊണ്ടുപോകാനാണ് ഇരുരാജ്യങ്ങളും ശ്രമിക്കുന്നതെന്ന വിലയിരുത്തലാണ് ഉയരുന്നത്.

അതേസമയം, ട്രംപിന്റെ പരാമർശത്തിനെതിരെ സമൂഹമാധ്യമമായ എക്സിൽ നിരവധി ഇന്ത്യൻ ഉപയോക്താക്കൾ സംശയാത്മക പ്രതികരണങ്ങളുമായി രംഗത്തെത്തി. ഇന്ത്യയെക്കുറിച്ച് ട്രംപ് മുമ്പ് നടത്തിയ വിവാദ “ഹെൽഹോൾ” പരാമർശങ്ങൾ, തീരുവ വിഷയങ്ങളിലെ കടുത്ത നിലപാടുകൾ, ഇന്ത്യ-പാകിസ്ഥാൻ വെടിനിർത്തലിൽ മധ്യസ്ഥത വഹിച്ചതായി നടത്തിയ അവകാശവാദങ്ങൾ എന്നിവ ചൂണ്ടിക്കാട്ടിയാണ് വിമർശനം ഉയർന്നത്.

വാക്കുകളേക്കാൾ പ്രവൃത്തികൾക്കാണ് പ്രാധാന്യമെന്ന് ചിലർ പ്രതികരിച്ചപ്പോൾ, ഇന്ത്യ-അമേരിക്ക ബന്ധത്തിൽ സ്ഥിരതയും പരസ്പര ബഹുമാനവുമാണ് നിർണായകമെന്നും സാമൂഹ്യമാധ്യമങ്ങളിൽ അഭിപ്രായങ്ങൾ ഉയർന്നു.