ദോഹ, ജൂൺ 23: ഖത്തറിലെ റാസ് ലഫാൻ വ്യവസായ മേഖലയിലെ വൻ സ്ഫോടനത്തിൽ മരിച്ചവരിൽ 12 ഇന്ത്യൻ പൗരന്മാരുണ്ടെന്ന് ദോഹയിലെ ഇന്ത്യൻ എംബസി സ്ഥിരീകരിച്ചു. ഞായറാഴ്ച രാത്രി രാജ്യത്തെ ഏറ്റവും വലിയ ദ്രവീകൃത പ്രകൃതി വാതക (LNG) സംസ്കരണ കേന്ദ്രത്തിൽ ഉണ്ടായ അപകടത്തിൽ ആകെ 13 പേർ കൊല്ലപ്പെടുകയും 66 പേർക്ക് പരിക്കേൽക്കുകയും ചെയ്തതായി അധികൃതർ അറിയിച്ചു.

സാമൂഹിക മാധ്യമങ്ങളിലൂടെ പുറത്തിറക്കിയ പ്രസ്താവനയിൽ ഇന്ത്യൻ എംബസി മരിച്ചവരുടെ കുടുംബങ്ങളോട് അനുശോചനം രേഖപ്പെടുത്തുകയും ആത്മശാന്തിക്കായി പ്രാർത്ഥിക്കുകയും ചെയ്തു. അപകടത്തിൽ പരിക്കേറ്റ എല്ലാവരുടെയും നില തൃപ്തികരമാണെന്നും അവർക്ക് ആവശ്യമായ ചികിത്സ ലഭ്യമാക്കുകയാണെന്നും ഖത്തർ അധികൃതർ അറിയിച്ചതായും എംബസി വ്യക്തമാക്കി.

വിദേശകാര്യ മന്ത്രി ഡോ. എസ്. ജയശങ്കർ സംഭവത്തിൽ ജീവൻ നഷ്ടപ്പെട്ടവരുടെയും പരിക്കേറ്റവരുടെയും കുടുംബങ്ങളോട് അനുശോചനം രേഖപ്പെടുത്തി. ഇന്ത്യൻ പൗരന്മാരെ ബാധിച്ച ദുരന്തവുമായി ബന്ധപ്പെട്ട് ദോഹയിലെ ഇന്ത്യൻ എംബസി ഖത്തർ അധികൃതരുമായി തുടർച്ചയായി ബന്ധപ്പെടുകയാണെന്നും ബാധിത കുടുംബങ്ങൾക്ക് ആവശ്യമായ എല്ലാ സഹായവും നൽകാൻ നടപടികൾ സ്വീകരിച്ചുവരുകയാണെന്നും അദ്ദേഹം സാമൂഹിക മാധ്യമ പോസ്റ്റിൽ പറഞ്ഞു.

ഖത്തറിന്റെ ആഭ്യന്തര മന്ത്രാലയത്തിന്റെ വിവരമനുസരിച്ച്, റാസ് ലഫാൻ വ്യവസായ മേഖലയിലെ പ്രധാന എൽ എൻ ജി സംസ്കരണ കേന്ദ്രത്തിലാണ് സാങ്കേതിക തകരാറിനെ തുടർന്ന് സ്ഫോടനം ഉണ്ടായത്. അപകടത്തിൽ കുറഞ്ഞത് 13 പേർ മരിക്കുകയും 66 പേർക്ക് പരിക്കേൽക്കുകയും ചെയ്തു.

ഖത്തറിന്റെ ഊർജമന്ത്രി സഅദ് ഷെരിദ അൽ-കഅബി സ്ഫോടനം രാജ്യത്തിന്റെ എൽഎൻജി കയറ്റുമതിയെ ബാധിക്കില്ലെന്ന് വ്യക്തമാക്കി. ഇത് ഒരു വ്യാവസായിക അപകടമാണെന്നും അട്ടിമറിയോ ശത്രുതാപരമായ ആക്രമണമോ അല്ലെന്നും അദ്ദേഹം പറഞ്ഞു.

ദോഹയിൽ നിന്ന് ഏകദേശം 80 കിലോമീറ്റർ വടക്കായി സ്ഥിതി ചെയ്യുന്ന റാസ് ലഫാൻ തുറമുഖം ലോകത്തിലെ ഏറ്റവും വലിയ കൃത്രിമ തുറമുഖമായും ലോകത്തിലെ ഏറ്റവും വലിയ എൽഎൻജി കയറ്റുമതി കേന്ദ്രമായും അറിയപ്പെടുന്നു. ഈ വർഷം ആദ്യം ഇറാന്റെ ആക്രമണ ലക്ഷ്യമായിരുന്ന ഈ തന്ത്രപ്രധാന ഊർജകേന്ദ്രത്തിന് നേരെയുണ്ടായിരുന്ന ആക്രമണങ്ങളുമായി നിലവിലെ അപകടത്തിന് ബന്ധമില്ലെന്നാണ് അധികൃതർ വ്യക്തമാക്കുന്നത്.

സ്ഫോടനത്തിന്റെ യഥാർത്ഥ കാരണം കണ്ടെത്തുന്നതിനായി അന്വേഷണം പുരോഗമിക്കുകയാണ്. അതേസമയം, ദുരന്തബാധിത പ്രദേശത്ത് രക്ഷാപ്രവർത്തനങ്ങളും സുരക്ഷാ നടപടികളും തുടരുകയാണ്.