ന്യൂഡൽഹി: രാജ്യത്തെ പരമോന്നത സിവിലിയൻ ബഹുമതികളിലൊന്നായ പത്മപുരസ്കാര ചടങ്ങിൽ നടൻ മമ്മൂട്ടിക്ക് ജീവിതകാലത്തെ അസാധാരണ സംഭാവനകൾക്കുള്ള ആദരം ലഭിച്ച വേളയിൽ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയതിന്റെ സന്തോഷം പങ്കുവെച്ച് നടൻ ദുൽഖർ സൽമാൻ
സാമൂഹിക മാധ്യമങ്ങളിലൂടെയായിരുന്നു ദുൽഖറിന്റെ പ്രതികരണം. “ഇന്ത്യയുടെ ബഹുമാനപ്പെട്ട പ്രധാനമന്ത്രി ശ്രീ നരേന്ദ്ര മോദിജിയെ കാണാനും അദ്ദേഹത്തോടൊപ്പം സമയം ചെലവഴിക്കാനും കഴിഞ്ഞത് വലിയ അഭിമാനമാണ്. എന്റെ പിതാവായ മമ്മൂട്ടിയെ ജീവിതകാലത്തെ അസാധാരണ പ്രവർത്തനങ്ങൾക്കുള്ള ആദരവോടെ ആദരിക്കുന്ന ചടങ്ങിന് സാക്ഷ്യം വഹിക്കാൻ കഴിഞ്ഞു. ഞങ്ങളുടെ കുടുംബത്തിന് ഒരിക്കലും മറക്കാനാകാത്ത ദിനമായിരുന്നു അത്,” എന്നാണ് ദുൽഖർ കുറിച്ചത്.
രാജ്യത്തിന്റെ വിവിധ മേഖലകളിൽ മികച്ച സംഭാവനകൾ നൽകിയ വ്യക്തികൾക്കുള്ള പത്മപുരസ്കാര വിതരണച്ചടങ്ങിൽ, ഇന്ത്യൻ സിനിമയ്ക്ക് നൽകിയ വിലമതിക്കാനാവാത്ത സംഭാവനകളെ മാനിച്ചാണ് മമ്മൂട്ടിയെ ആദരിച്ചത്. ചടങ്ങിൽ കുടുംബാംഗങ്ങളും അടുത്ത ബന്ധുക്കളും പങ്കെടുത്തു.
മലയാള സിനിമയിലെ നാല് പതിറ്റാണ്ടിലേറെ നീണ്ട അഭിനയജീവിതത്തിനിടെ അനേകം ശ്രദ്ധേയ കഥാപാത്രങ്ങളിലൂടെ പ്രേക്ഷകഹൃദയം കീഴടക്കിയ മമ്മൂട്ടിയ്ക്ക് ലഭിച്ച ഈ ദേശീയ അംഗീകാരം കേരളത്തിനും ഇന്ത്യൻ സിനിമയ്ക്കും അഭിമാന നിമിഷമായി വിലയിരുത്തപ്പെടുന്നു.
