ലോകകപ്പ് റൗണ്ട് ഓഫ് 32 മത്സരത്തിനായി അമേരിക്കയിലെ ഹാർഡ് റോക്ക് സ്റ്റേഡിയത്തിലേക്ക് യാത്രതിരിച്ച നിലവിലെ ചാമ്പ്യൻമാരായ അർജന്റീന ടീമിന്റെ വിമാനത്താവളത്തിലെ സുരക്ഷാ പരിശോധനയ്ക്കിടെയുണ്ടായ ഒരു നിമിഷമാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്. പരിശീലന വേഷത്തിൽ ബാക്ക്പാക്കുകളും ലഗേജ് ട്രോളികളുമായി എത്തിയ ടീമംഗങ്ങൾ പതിവ് ടിഎസ്എ (Transportation Security Administration) സുരക്ഷാ പരിശോധനയ്ക്ക് വിധേയരായി.
ടീമിലെ സൂപ്പർതാരം ലയണൽ മെസ്സി ഉൾപ്പെടെയുള്ള താരങ്ങൾ ആഭ്യന്തര ചാർട്ടർ വിമാനയാത്രകൾക്കുള്ള സാധാരണ നടപടിക്രമങ്ങൾ പാലിച്ചാണ് പരിശോധന പൂർത്തിയാക്കിയത്. യാതൊരു പ്രത്യേക പരിഗണനയും ഇല്ലാതെ സുരക്ഷാ പരിശോധനയ്ക്ക് നിൽക്കുന്ന താരങ്ങളുടെ ദൃശ്യങ്ങൾ സമീപത്തെ ഒരു ഓഫീസിൽ നിന്ന് പകർത്തിയ വീഡിയോയിലൂടെ പുറത്തുവന്നു.
വീഡിയോയിൽ പരിശോധനയ്ക്കിടെ മെസി പൊട്ടിച്ചിരിച്ച് സഹതാരങ്ങളുമായി സൗഹൃദ സംഭാഷണത്തിൽ ഏർപ്പെടുന്ന രംഗങ്ങളാണ് ആരാധകരുടെ ശ്രദ്ധ പിടിച്ചുപറ്റിയത്. “ലോകത്തിലെ മികച്ച താരത്തിനും സുരക്ഷാ പരിശോധനയിലെ വരി ഒഴിവാക്കാനാകില്ല” എന്ന തരത്തിലുള്ള പ്രതികരണങ്ങളാണ് സമൂഹമാധ്യമങ്ങളിൽ നിറയുന്നത്.
ഗ്രൂപ്പ് ജെയിൽ ഒന്നാം സ്ഥാനക്കാരായ അർജന്റീന, മികച്ച ഫോമിലുള്ള കേപ് വെർഡെ ദേശീയ ഫുട്ബോൾ ടീമിനെ വെള്ളിയാഴ്ച വൈകിട്ട് 6 മണിക്ക് (ET) അമേരിക്കയിലെ ഹാർഡ് റോക്സ് സ്റ്റേഡിയത്തിൽ നടക്കുന്ന റൗണ്ട് ഓഫ് 32 പോരാട്ടത്തിൽ നേരിടും.
