തിരുവനന്തപുരം: കേരളത്തിലെ ആറ് പ്രധാന റെയിൽവേ സ്റ്റേഷനുകൾ അമൃത് ഭാരത് സ്റ്റേഷൻ പദ്ധതിയുടെ ഭാഗമായി സമഗ്രമായി നവീകരിച്ചതായി ദക്ഷിണ റെയിൽവേ തിരുവനന്തപുരം ഡിവിഷൻ ഔദ്യോഗികമായി അറിയിച്ചു. അങ്കമാലി, ചാലക്കുടി, തിരൂർ, പരപ്പനങ്ങാടി, നിലമ്പൂർ റോഡ്, തലശ്ശേരി എന്നീ സ്റ്റേഷനുകളാണ് പുതിയ രൂപത്തിൽ യാത്രക്കാർക്കായി സമർപ്പിക്കുന്നത്.
നവീകരിച്ച സ്റ്റേഷനുകളുടെ ചിത്രങ്ങളും ദക്ഷിണ റെയിൽവേ സാമൂഹ്യമാധ്യമങ്ങളിലൂടെ പങ്കുവെച്ചിട്ടുണ്ട്. ആധുനിക സ്റ്റേഷൻ കെട്ടിടങ്ങൾ, വിശാലവും സൗകര്യപ്രദവുമായ കാത്തിരിപ്പ് കേന്ദ്രങ്ങൾ, ഭിന്നശേഷിക്കാർക്ക് കൂടുതൽ സൗകര്യപ്രദമായ പ്രവേശന സംവിധാനങ്ങൾ, ഡിജിറ്റൽ വിവരസൗകര്യങ്ങൾ, മെച്ചപ്പെടുത്തിയ യാത്രാസൗകര്യങ്ങൾ എന്നിവ സ്റ്റേഷനുകളിൽ ഒരുക്കിയിട്ടുണ്ട്. കേരളത്തിന്റെ തനത് ശൈലി ഉൾക്കൊള്ളുന്ന ഡിസൈൻ ഘടകങ്ങളും നവീകരണത്തിന്റെ ഭാഗമായി ഉൾപ്പെടുത്തിയിട്ടുണ്ട്.
രാജ്യത്തെ റെയിൽവേ സ്റ്റേഷനുകളെ അന്താരാഷ്ട്ര നിലവാരത്തിലേക്ക് ഉയർത്തുക എന്ന ലക്ഷ്യത്തോടെ കേന്ദ്ര സർക്കാർ നടപ്പാക്കുന്ന അമൃത് ഭാരത് സ്റ്റേഷൻ പദ്ധതിയുടെ ഭാഗമായാണ് ഈ വികസന പ്രവർത്തനങ്ങൾ. യാത്രക്കാരുടെ സൗകര്യം വർധിപ്പിക്കുന്നതിനൊപ്പം സ്റ്റേഷനുകളുടെ സൗന്ദര്യവും പ്രവർത്തനക്ഷമതയും മെച്ചപ്പെടുത്തുകയാണ് പദ്ധതിയുടെ പ്രധാന ലക്ഷ്യം.
സ്റ്റേഷൻ നവീകരണത്തോടൊപ്പം ഇന്ത്യൻ റെയിൽവേയുടെ ആധുനികവൽക്കരണ ശ്രമങ്ങളുടെ ഭാഗമായ ഹൈഡ്രജൻ ട്രെയിൻ ഉൾപ്പെടെയുള്ള പുതിയ പദ്ധതികളെയും ദക്ഷിണ റെയിൽവേയുടെ പോസ്റ്റിൽ പരാമർശിച്ചിട്ടുണ്ട്. കേരളത്തിലെ റെയിൽ യാത്രാ അനുഭവം കൂടുതൽ സുരക്ഷിതവും സൗകര്യപ്രദവുമാക്കുന്ന സുപ്രധാന ചുവടുവയ്പ്പായാണ് ഈ വികസനത്തെ വിലയിരുത്തുന്നത്.
