ജറുസലേം: അമേരിക്കയ്ക്കപ്പുറം പുതിയ തന്ത്രപ്രധാന സഖ്യങ്ങൾ ശക്തിപ്പെടുത്തേണ്ടതിന്റെ ആവശ്യകത ഊന്നിപ്പറഞ്ഞ് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ഇന്ത്യയുമായുള്ള ബന്ധത്തിൽ ഇസ്രയേൽ വലിയ നിക്ഷേപമാണ് നടത്തുന്നതെന്നും പ്രധാനമന്ത്രി നരേന്ദ്ര മോദി “ഞങ്ങളുടെ ഏറ്റവും വലിയ സുഹൃത്തുക്കളിൽ ഒരാളാണ്” എന്നും അദ്ദേഹം ഒരു അഭിമുഖത്തിൽ പറഞ്ഞു.

അമേരിക്കയുമായുള്ള ബന്ധം ഇസ്രയേലിന്റെ വിദേശനയത്തിലെ പ്രധാന ഘടകമായി തുടരുമെങ്കിലും, മാറുന്ന ആഗോള സാഹചര്യത്തിൽ മറ്റ് വിശ്വസ്ത പങ്കാളികളുമായുള്ള സഹകരണം കൂടുതൽ വിപുലീകരിക്കേണ്ടത് അനിവാര്യമാണെന്ന് നെതന്യാഹു അഭിപ്രായപ്പെട്ടു. ഈ പശ്ചാത്തലത്തിലാണ് ഇന്ത്യയുമായുള്ള ബന്ധം കൂടുതൽ ആഴത്തിലാക്കാൻ ഇസ്രയേൽ ശ്രമിക്കുന്നതെന്നും അദ്ദേഹം വ്യക്തമാക്കി.

2026 ഫെബ്രുവരിയിൽ പ്രധാനമന്ത്രി നരേന്ദ്ര മോദി ഇസ്രയേൽ സന്ദർശിച്ചതിന് പിന്നാലെ ഇന്ത്യ-ഇസ്രയേൽ ബന്ധം “പ്രത്യേക തന്ത്രപ്രധാന പങ്കാളിത്തം” എന്ന നിലയിലേക്ക് ഉയർത്തിയിരുന്നു. പ്രതിരോധ സഹകരണം, ആയുധ കയറ്റുമതി, സാങ്കേതികവിദ്യ, കൃത്രിമ ബുദ്ധി , സൈബർ സുരക്ഷ, വ്യാപാരം തുടങ്ങിയ മേഖലകളിൽ ഇരു രാജ്യങ്ങളും സഹകരണം വിപുലീകരിച്ചുവരികയാണ്.

പ്രാദേശിക സംഘർഷങ്ങളുടെ പശ്ചാത്തലത്തിൽ ചില പാശ്ചാത്യ രാജ്യങ്ങളുമായുള്ള ബന്ധത്തിൽ വെല്ലുവിളികൾ നിലനിൽക്കുന്ന സാഹചര്യത്തിൽ, ഇന്ത്യയെ വിശ്വസനീയമായ പങ്കാളിയായാണ് ഇസ്രയേൽ കാണുന്നതെന്ന് റിപ്പോർട്ടുകൾ സൂചിപ്പിക്കുന്നു. ഇന്ത്യയിൽ ഇസ്രയേലിനോടുള്ള പൊതുജന പിന്തുണയും ഉഭയകക്ഷി ബന്ധം കൂടുതൽ ശക്തിപ്പെടുത്താൻ സഹായകമാണെന്നാണ് ഇസ്രയേലിന്റെ വിലയിരുത്തൽ.

നെതന്യാഹുവിന്റെ പരാമർശങ്ങൾ ഇന്ത്യ-ഇസ്രയേൽ ബന്ധം കൂടുതൽ ശക്തിപ്പെടുന്നതിന്റെ സൂചനയായാണ് വിലയിരുത്തപ്പെടുന്നത്. ഇരു രാജ്യങ്ങളും തന്ത്രപ്രധാന മേഖലകളിലെ സഹകരണം വരും വർഷങ്ങളിലും വിപുലീകരിക്കുമെന്ന പ്രതീക്ഷയാണ് നയതന്ത്ര വൃത്തങ്ങൾ പങ്കുവെക്കുന്നത്.